Актёр Йигитали Мамажонов «Даракчи.uz» сайтининг «Қисқа ва лўнда» лойиҳасида иштирок этиб, кўпчиликни қизиқтирган саволларга жавоб берди.
Мавсум янгилиги
Айни кунларда янги фильмнинг суратга олиш ишлари билан бандмиз. Ёш режиссёр Малика Тешабоеванинг «Бегуноҳ» картинасида бош роллардан бирини ижро этяпман. Бундан ташқари, Куваниш Реймбаев суратга олаётган «Коктейл»фильмида ҳам ҳамкорлик қиляпмиз.
Тушкунликка тушсам...
Мен аввало тушкунликка тушмасликка ҳаракат қиламан. Чунки ҳар бир кунимиз ғанимат. Уни хафагарчиликда, ёмон кайфиятда ўтказмаслигимиз керак. Лекин ҳар хил вазият бўлади. Агар кайфиятимни туширадиган вазият бўлиб қолса, онажоним билан гаплашишга ҳаракат қиламан. Оналарнинг дуосида гап кўп.
Спорт
Спорт билан мунтазам шуғулланишимни кўпчилик яхши билади. Аммо буни ҳадеб такрорлайверсам, ўқиган одамга эриш туйилиши, худди мақтанаётгандек бўлиб кўринишим мумкин. Инсон спорт билан атрофдагилар учун эмас, ўз соғлиғини ўйлаб шуғулланади.
Мўъжиза
Бу борада жуда кўп гапирса бўлади. Қисқача айтсам, инсон яралишининг ўзи бир мўъжиза.
Миш-мишлар...
Очиғи, гап-сўзларга жиддий қарамайман. Одамлар ё бекорчиликдан, билиб-билмай ёки атайлаб миш-миш гапларни тарқатиши мумкин. Шундай экан, бундай гапларга эътибор бермасликка ҳаракат қиламан, бошқаларга ҳам шуни маслаҳат бераман. Мен ҳақимда доим турли гап-сўзлар юради. Уларни изоҳлаб, ўзимни оқлашим шарт эмас. Мени яхши таниганлар қандайлигимни билади.
Ёлғон
Ўзим ёлғон гапирмайман. Шунинг учун ҳам алдайдиганларни ёқтирмайман. Агар суҳбатдошим менга ёлғон гапираётган бўлса, уни тезда англаб оламан. Буни кўзларидан билиб оламан. Аммо ўша одам билан ҳеч қачон урушиб, жанжаллашмяман. Ўзим учун хулоса қиламан.
Хафа қилсам...
Агар кимнидир билиб-билмай ранжитиб қўйсам, ўша заҳоти кечирим сўрайман. Акс ҳолда, «кўнглини оғритиб қўйдим», деб сиқилиб юраман. Агар айб менда бўлмаса, вазиятга қарайман. Агар мендан ёши катта инсон бўлса, ҳар қандай ҳолатда узр сўрашдан уялмайман. Кечиримли бўлиш инсоннинг энг яхши фазилатларидан биридир.
Ёқтирмаган савол
Шахсий ҳаётимга тегишли бўлган саволларни ёқтирмайман. Айниқса, бегона ва ҳаётимга алоқаси бўлмаган инсон шундай савол берса, жаҳлим чиқиши аниқ. Чунки ҳаётим, оилам ва ўзимни бировлар билан муҳокама қилишни ёмон кўраман.
Кумир
Кумирларим жуда кўп. Актёрлардан Ал Пачино, Роберт Де Ниро, Том Хенкс, Рассел Кроу, Леонардо Ди Каприо, Уилл Смит ва яна кўпларнинг ижодини кузатиб, ўрганаман. Хонандалардан эса Майкл Жексон, Адел, Андреа Бочелли, Бетховен, Бах, Шостакович, Чайковский ва бошқа классик ва эстрада ижодкорлари қўшиқларини мазза қилиб тинглайман.
Саёҳат
Кўпгина жойларга саёҳатга боришни истайман. Асосийси, йўл олган жойим тинч бўлиши шарт. Кейин тарихи, манзараси, иқлими ҳам менга тўғри келишига қараб, саёҳатга чиқаман.
Оила
Оила мавзусида жуда кўп саволлар беришади. Уларга жавоб беришни ёқтирмаслигимни айтим, лекин шундай бўлса-да, «Даракчи» учун қисқача тўхталиб ўтаман: яна бир бор оила қуришим аниқ. Фақат қачонлигини ўзим ҳам билмайман. Бир кун албатта оқила, одобли, озода, итоаткор қиз учрашига ишонаман.
***
Маълумот учун, актёр Йигитали Мамажонов хонанда Райҳон Ғаниева билан 2012 йилнинг ноябрида турмуш қурган эди. 2014 йилнинг май ойида эса Райҳон эгизак фарзанд туққан, уларга Ислом ва Имрон деб исм қўйилган.
2015 йил январида Райҳон ажрашишга ариза бергани, 2016 йил май ойида эса Райҳон ва Йигиталининг никоҳи қонунан бекор қилингани маълум қилинган эди.
Изоҳ (0)