Тошкент шаҳрининг Мирзо Улуғбек туманига янги ҳоким тайинланди

Шерзод Кудбиев Тошкент шаҳрининг Мирзо Улуғбек туманига ҳоким этиб тайинланди. Бу ҳақда шаҳар ҳокимлиги сайтида ахборот берилган.

Мирзо Улуғбек тумани ҳокимлиги сайти ахборотига кўра, Шерзод Кудбиев (1981 йил Фарғона вилоятида туғилган) Фарғона политехника институтида ассистент, катта ўқитувчи (2002—2007 йилларда), Ўзбекистон Меҳнат вазирлиги тузилмаларида мутахассис, бошқарма бошлиғи ўринбосари (2007—2010), Ўзбекистон Вазирлар Маҳкамаси тузилмаларида мутахассис (2010—2012) сифатида меҳнат қилган.

2012—2015 йилларда Шерзод Кудбиев Республика аҳоли бандлиги, меҳнатни муҳофаза қилиш ва аҳолини ижтимоий муҳофаза қилиш илмий марказига директорлик қилган. Мирзо Улуғбек тумани ҳокими этиб тайинлангунига қадар, Кудбиев Вазирлар Маҳкамасида департамент мудири ўринбосари лавозимида ишлаб келаётган эди.

Кудбиев Мирзо Улуғбек тумани ҳокими лавозимида Шомансур Аҳмедовни алмаштирди. Аҳмедов 18 сентябрь куни Ўзбекистон Президенти вазифасини бажарувчи Шавкат Мирзиёев иштирокидаги йиғилишда ўз лавозимидан озод этилган эди.

Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.