Ўзбекистонда ўтказилаётган Ахборот-коммуникация технологиялари ҳафталиги доирасида 21 сентябрь куни навбатдаги ICTExpo 2016 ахборот-коммуникация технологиялари кўргазмаси ўз ишини бошлади, дея хабар бермоқда Ахборот технологиялари ва коммуникацияларини ривожлантириш вазирлиги.
АКТдан фойдаланиш бўйича минтақавий даражанинг ўсиб бораётгани боис, кўргазма анъанага кўра, тармоқли кўринишда ташкил этилиб, бир вақтнинг ўзида Тошкент ва Наманган шаҳарларида бўлиб ўтмоқда.
Кўргазмада электрон ҳукумат тизимининг жорий этилишида ҳозирги кунга қадар амалга оширилган ишлар, хусусан давлат бошқаруви органлари томонидан аҳолига, тадбиркорлик субъектларига кўрсатилаётган интерактив хизматлар намойиш этилади.
ICTExpo 2016 кўргазмасида Тошкент шаҳрининг ўзида 1 минг кв. метрдан ортиқ ҳудудда маҳаллий ҳамда халқаро IT бозорининг 120 дан ортиқ, Наманган шаҳрида эса 500 кв. метрга яқин ҳудудда 40 дан ортиқ Наманган ва Андижон вилоятларидаги етакчи компаниялар томонидан соҳада кўрсатилаётган хизматлар, замонавий технология ва ишланмалар намойиш этилади. Кўргазмада маҳаллий ишлаб чиқарувчилар, шунингдек, компьютер техникасини ишлаб чиқарувчи корхоналар, дастурий таъминот ишлаб чиқарувчилар, IT-компаниялар дилерлари, провайдерлар, телекоммуникация ускуналарини етказиб берувчилар, банк ва бошқа муассасалар вакиллари ўзларининг қизиқарли стендларини ташкил этмоқдалар.
Уч кун давомида кўргазмада 35 мингдан зиёд ташриф буюрувчилар кутилмоқда.
Изоҳ (0)