20—21 сентябрь кунлари Қорақалпоғистон Жўқорғи Кенгеси, вилоятлар ва Тошкент шаҳар Кенгашларининг сессиялари бўлиб ўтди. Уларда Ўзбекистон Президенти сайловини ўтказувчи округ сайлов комиссиялари аъзолигига номзодлар муҳокама қилинди. Бу ҳақда Ўзбекистон Президенти сайловини ёритиш бўйича Республика матбуот маркази хабар бермоқда.
«Ўзбекистон Республикаси Президенти сайлови тўғрисида»ги Қонунга ва Асосий тадбирлар дастури мувофиқ, Ўзбекистон Президенти сайловини ўтказувчи сайлов округлари Қорақалпоғистон Республикаси, вилоятлар ва Тошкент шаҳри чегаралари доирасида тузилди.
Сайлов округлари рўйхати сайловчилар сони ҳамда округ сайлов комиссиялари манзили кўрсатилган ҳолда матбуотда эълон қилинди.
Ўзбекистон Президенти сайловини ўтказувчи округ сайлов комиссиялари Марказий сайлов комиссияси томонидан сайловга камида 70 кун қолганида комиссия раиси, раис ўринбосари, котиби ва камида 6—8 нафар аъзосидан иборат таркибда тузилади.
Округ сайлов комиссияларининг аъзолари жамоатчиликнинг обрўли вакиллари орасидан танланиб, Қорақалпоғистон Республикаси Жўқорғи Кенгеси, халқ депутатлари вилоятлар ва Тошкент шаҳар Кенгашларининг тавсияси билан Марказий сайлов комиссияси томонидан тасдиқланади.
Жойлардаги давлат ҳокимияти вакиллик органлари сессияларида муҳокамалар натижасида округ сайлов комиссиялари таркибига номзодлар тавсия қилиш бўйича тегишли қарорлар қабул қилинди.
Изоҳ (0)