Жанубий кореялик ҳарбийлар КХДР ядро полигонида юқори даражадаги фаоллик кузатилаётганини қайд этди. Бу ҳақда 21 сентябрь, чоршанба куни Жанубий Корея Миллий мудофаа вазирлигининг вакили маълум қилди, деб ёзади «ТАСС».
«Пхеньян яна бир ядро синовини ўтказишга тайёргарлик кўраётган бўлиши мумкин», — деб таъкидлади вазирликдаги манба.
Вакилнинг сўзларига қараганда, КХДРнинг Хамгён-Пукто вилоятида жойлашган Пунгёри полигонида сўнгги вақтларда ҳарбий ва қурилиш техникаларининг фаол ҳаракатланиши кузатилган.
«Бундан ташқари, 3-рақамли туннелга кириш қисмида улкан чалғитувчи чодир тортилган, бу чодир ҳудудни осмондан кўришни қийинлаштирмоқда», — деди Мудофаа вазирлиги вакили.
Унинг сўзларига қараганда, айнан шу туннелда навбатдаги атом синови ўтказилиши мумкин. Ҳарбий КХДР янги ядро синовини кейинги ойнинг биринчи ўн кунлигида — ҳар йили 10 октябрь куни нишонланадиган Корея меҳнат партияси ташкил этилган кун байрамида амалга ошириши мумкинлигини тахмин қилди.
Пхеньян 9 сентябрь куни ўз тарихидаги бешинчи ва энг кучли ядровий синовни ўтказди. КХДР бунгача 2006, 2009, 2013 йилларда ва 2016 йил январида атом бомбаларини синовдан ўтказган, деб ҳисобланилади.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)