Ўзбекистон Президенти вазифасини бажарувчи, Бош вазир Шавкат Мирзиёев жойларда кетаётган ижтимоий-иқтисодий ислоҳотлар, саноат ва ижтимоий соҳада амалга оширилаётган кенг миқёсли ишлар билан танишиш мақсадида 20 сентябрь куни Ангрен шаҳрига ташриф буюрди. Бу ҳақда UzReport хабар бермоқда.
Хусусан, у «‘Ангрен’ МИЗ ҳудудида конвейер тасмалари, қишлоқ хўжалиги шиналари ишлаб чиқаришни ташкил этиш» лойиҳаси реализацияси билан танишди. Унинг доирасида йилига 100 минг метр конвейер тасмалари, 200 минг қишлоқ хўжалиги шиналари, 3 миллион автомобиль шиналари ишлаб чиқариш режалаштирилмоқда. 2015–2018 йилларга мўлжалланган лойиҳа реализацияси 1200 иш ўрни яратиш имкониятини беради.
Ўзбекистон Президентининг 2015 йил 28 августдаги «‘Ангрен’ МИЗ ҳудудида конвейер тасмалари, қишлоқ хўжалиги шиналари ишлаб чиқаришни ташкил этиш’ инвестицион лойиҳасини амалга ошириш чора-тадбирлари тўғрисида»ги қарорига мувофиқ, 2016/2017-ўқув йилидан бошлаб Тошкент кимё-техника институтида резина-техника буюмлари технологияси мутахассислиги бўйича кадрлар тайёрлаш амалга оширилмоқда.
Шунингдек, лойиҳа доирасида заводнинг 105 мутахассиси Хитойдаги тегишли йўналишдаги заводларда стажировка ўтаб қайтади.
Шу куннинг ўзида Шавкат Мирзиёев Ангрен ИЭСнинг янги энергоблокини кўздан кечирди. Бу ердаги қурилиш-монтаж ишлари жорий йилнинг август ойида якунланган эди.
Августда янги энергоблок илк бора ишга туширилган эди. Сентябрь ойида лойиҳавий қувват билан ишлай бошлаган энергоблок йилига 840 миллион кВт/соат электр энергияси ва 423 минг гигакалория иссиқлик энергияси ишлаб чиқарилишини таъминлайди.
Шунингдек, Шавкат Мирзиёев «Ангрен» кўмир конидаги юзани очиш, кўмир қазиб олиш ва етказиш ишлари ҳамда «Ўзбеккўмир» АЖни қайта жиҳозлаш жараёни билан танишиб чиқди. 2016 йил 15 сентябрь ҳолатига кўра юзани очиш ишлари ҳажми 15,4 миллион метрни кубни, кўмир қазиб олиш ҳажми 2,6 миллион тоннани ташкил этди. Йил охирига қадар 23 миллион метр куб юза очилиши, кўмир қазиб олиш ҳажмини эса 3,7 миллион тоннага етказиш режалаштирилмоқда.
Бундан ташқари, сафар чоғида Шавкат Мирзиёев 24-сонли мактабгача таълим муассасаси ҳамда Ангрен «Деҳқон бозори»да бўлди.
Ангрен шаҳар фаоллари йиғилишида Ўзбекистоннинг Биринчи Президенти Ислом Каримовнинг фаолияти ҳамда мустақилликка эришиш, юрт равнақини таъминлаш, тинчлик ва халқ фаровонлигини мустаҳкамлашдаги улкан хизматлари алоҳида қайд қилиб ўтилди. Унинг узоқни кўзлаган сиёсати туфайли Ўзбекистон бир томонлама иқтисодиётга эга қолоқ мамлакатдан замонавий саноатлашган мамлакатга айланди. Буни саноатнинг иқтисодиётдаги 34 фоизлик ўрни ҳамда экспорт маҳсулотлари ҳажмининг йиллик 70 фоиз ўсиши яққол намойиш этиши таъкидлаб ўтилди.
Ислом Каримов ташаббусига кўра ташкил этилган «Ангрен» эркин индустриал зонасида 11 та йирик инвестицион лойиҳа амалга оширилди. Йил охирига қадар 7 та янги ишлаб чиқаришни фойдаланишга топшириш режалаштирилмоқда.
Шу билан бирга, бўлиб ўтган йиғилишда Ангрен инфраструктурасига оид масалалар таҳлил қилинди. Шаҳар ҳокимига, тегишли вазирлик ва идоралар раҳбарларига мавжуд камчиликларни бартараф этиш бўйича кўрсатмалар берилди.
Шунингдек, бир қатор ташкилий масалалар кўриб чиқилди.
Изоҳ (0)