Рио–2016 Паралимпия ўйинларида жиддий ҳалокатга учраган эронлик велопойгачи юрак хуружидан вафот этди

Халқаро паралимпия қўмитаси Рио–2016 Паралимпия ўйинларининг C4 тоифадаги велопойгалар баҳсида иштирок этган 48 ёшли эронлик Бахман Гулбарнажод жиддий ҳалокатга учраганидан сўнг вафот этганини маълум қилди, деб хабар бермоқда «РБК».

Гулбарнажод шифохонага олиб кетилаётганида тез ёрдам машинаси ичида юрак хуружидан вафот этди.

Ушбу ҳодисадан сўнг Паралимпия шаҳарчасидаги Эрон мамлакати ва Паралимпия ҳаракати байроқлари туширилди. Бугун, 18 сентябрь куни бўлиб ўтадиган Паралимпия ўйинлари ёпилиш маросими Гулбарнажод хотирасига 1 дақиқалик сукут билан бошланади.