Хитойда мамлакат тарихидаги энг қиммат — 1,1 млрд долларга баҳоланган ажрим қайд этилди

Хитойда мамлакат тарихидаги энг қиммат оилавий ажралиш жараёни якунига етди. Бу ҳақда «РБК» хабар бермоқда.

Beijing Kunlun Tech компанияси эълон қилган келишув шартларига кўра, компания раҳбари Чжоу Яхуэй турмуш ўртоғи Ли Цюнга умумий қиймати 1,1 миллиард доллар бўлган 300 миллион дона акцияни беради.

Айни вақтда, Яхуэй онлайн-ўйинларга ихтисослашган ва бозор нархи 4,3 миллиард доллар бўлган компаниянинг 34,5 фоизи устидан назоратни сақлаб қолади.

The Telegraph нашрига кўра, Чжоу Яхуэй ва Ли Цюн ажрашгунларига қадар Хитойнинг 40 ёшгача бўлган энг нуфузли жуфтлиги саналган.

Шу пайтгача Хитойда энг қимматга тушган деб ҳисоблаб келинган ажрим 2012 йили қайд этилган. Ўшанда Sany Group машинасозлик компанияси катта вице-президенти Юан Цзиньхуа собиқ рафиқасига 360 миллион долларга тенг акцияларни беришга мажбур бўлганди.

Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.