Қримдаги Қоратоғ табиий қўриқхонаси зоологлари дельфинлар бир-бири билан одамларга ўхшаб гаплаша олишини аниқлади. Тадқиқотчилар келажакда одам денгиз сут эмизувчилари билан мулоқот қила олишини тахмин этмоқда. Бу ҳақдаги мақола Mathematics and Physics журналида чоп этилди.
Дельфинлар визиллаш ва ҳуштак товушлари ёрдамида бир-бирига сигналлар юбора олади. Шу тариқа улар «қардошлари»га ўзининг соғлиғи ёки жойлашган жойи ҳақида хабар беради. Аммо олимлар денгиз сут эмизувчилари, бундан ташқари, сигналларни комбинациялаш, шунингдек, уларнинг давомийлиги ва қайталаниш даражасини ўзгартириш орқали сўзнинг муқобилларини шакллантириб, улардан гаплар ясай олишини кўрсатиб берди.
Зоологлар бассейнда яшайдиган Яша ва Яна лақабли иккита Қора денгиз афалинлари ўзаро сигналлар бирикмалари ёрдамида мулоқот қилаётганига эътибор қаратди. Ушбу сигналлар фонемалар (нутқнинг алоҳида товушлари) ёки бутун бир сўзлардан иборат бўлиб чиқди. Дельфинлар навбатма-навбат визиллаган товушларни чиқаради ва бир-бирини бўлмайди. Тадқиқотчилар сўзларига кўра, жониворларнинг тили инсоннинг оғзаки нутқига монанд хусусиятларга эга.
Яша ва Яна бешта сўздан иборат гапларни туза олади, бироқ зоологлар уларнинг маъносини тушуниб олганича йўқ. Олимлар энди одамлар ва дельфинлар ўртасидаги тил барьерини олиб ташлаш бўйича тадқиқотлар ўтказмоқчи, бунинг учун денгиз сут эмизувчилари сигналларини чиқарадиган махсус қурилмаларни яратиш керак.
Изоҳ (0)