Мажид Каримов бошқа ишга ўтиши муносабати билан Ўзбекистон бош вазирининг ўринбосари — Ёшларга оид сиёсат, таълим, маданият ва спорт масалалари комплекси раҳбари лавозимидан озод этилди. Ўзбекистон Президенти вазифасини бажарувчи Шавкат Мирзиёев бу ҳақдаги фармонни, Ҳукумат портали ахборотига кўра, 13 сентябрь куни имзолаган.
Мажид Каримов жорий йилнинг 10 августида Ўзбекистон бош вазирининг ўринбосари этиб тайинланган эди. Техника фанлари доктори даражасига эга бўлган Мажид Каримов бунгач тўрт йил давомида Тошкент давлат техника университетига раҳбарлик қилган.
Ўзбекистон Олий ва ўрта махсус таълим вазирлиги сайтида Мажид Каримов вазирнинг фан бўйича ўринбосари этиб тайинлангани ҳақида ахборот берилган.
Аввалроқ Ўзбекистон Президенти вазифасини бажарувчи Шавкат Мирзиёевнинг 13 сентябрдаги фармонига мувофиқ, Абдулла Арипов Ўзбекистон бош вазирининг ўринбосари — Ёшлар сиёсати, маданият, ахборот тизимлари ва телекоммуникациялари масалалари комплекси раҳбари лавозимига тасдиқлангани ҳақида хабар берилган эди.
Ҳукумат таркибидаги бошқа ўзгаришлар:
- Абдулла Арипов ҳукумат таркибига қайтди
- Ўзбекистон бош вазири ўринбосари Адҳам Икромов жисмоний тарбия ва спорт масалаларига ҳам масъул этиб тайинланди
- Рустам Азимовга таълим ва фан соҳаларига ҳам раҳбарлик қилиш юклатилди
Изоҳ (0)