Буюк Британияда собиқ бош вазир Уинстон Черчилл портрети туширилган 5 фунт стерлинг номиналидаги янги купюра 13 сентябрь, сешанба кунидан муомалага киритилмоқда. У мамлакат қамоқхона тизими ислоҳотчиси Элизабет Фрай (1780—1845) тасвирланган банкнотани алмаштиради, дея хабар беради «ТАСС».
Англия банки синтетик полимерлардан тайёрланган янги купюранинг экологик жиҳатдан талабга мувофиқ, қоғоз банкноталарга нисбатан икки баробар узоқроққа етиши, ҳимояланиш даражаси юқори, ўлчами эса тахминан 15 фоизга кичикроқ эканлигини таъкидламоқда. Мамлакатда бундай купюралар 440 миллион нусхада чиқарилиши кўзда тутилган.
Черчилл тасвирланган купюралар тўлов воситаси сифатида бошқа пластик банкноталар ҳам муомалага фаол киритилишини бошлаб беради. 2017 йилда 10, 2020 йилда эса 20 фунтли шундай пуллар муомалада пайдо бўлади. Англия банки пластик купюралар ҳажмини кўпайтириш ҳақида 3 йил давомидаги ўрганишлардан сўнг ўтган йил сентябрида, мазкур материалдан тайёрланган банкноталарнинг қалбакилаштиришдан ҳимояланиш даражаси анъанавий қоғоз купюралардан юқорироқ эканлиги ҳақида якуний хулосага келганди.
Изоҳ (0)