Жанубий Корея КХДРга қарата олдиндан шиддатли зарба бериш режасини ишлаб чиқди. Зарба Шимолий Корея ядро ҳужумига тайёргарлик кўришни бошласа, Пхеньянни ер билан яксон қилади. Бу ҳақда Сеулдаги ҳарбий манбаларга таяниб, «Рёнхап» агентлиги маълум қилди, деб хабар берди «Коммерсант.ru».
«Шимол ядро қуролидан фойдаланишнинг энг кичик кўринишини намойиш этган заҳоти ҳар бир туман, хусусан, Шимолий Корея раҳбарияти жойлашган ҳудудлар баллистик ракеталар ва фугас снарядлари билан тўлиқ вайрон этилади. Бошқача қилиб айтганда, Шимол пойтахти култепага айланади ва харитадан буткул ўчирилади», — маълум қилди манбалардан бири.
Яна бир манбага кўра, Жанубий Корея бунинг учун 300, 500 ва 1000 километргача етиб борадиган «Ер-ер» туркумидаги ракеталардан фойдаланиши мумкин.
Эслатиб ўтамиз, Шимолий Корея 9 сентябрь, жума куни бешинчи ва ўз тарихидаги энг кучли ядро синовини ўтказди.
Изоҳ (0)