Австралиялик сёрфингчи Янги Каледония пляжларидан бири акваториясида акула ҳужуми қурбонига айланди. Бу ҳақда ABC телекомпанияси маълум қилди, дея хабар бермоқда «ТАСС».
Кайтсёрфинг билан шуғулланаётган эркак бошқарувни қўлдан чиқариб, сувга тушиб кетган ва у ерда акула ҳужумига учраган. Йиртқич уни сонидан тишлаб олган.
Унинг яқинидаги катамарандаги одамлар уни сувдан чиқариб, биринчи ёрдам кўрсатди. Бироқ жароҳатнинг жуда чуқурлиги сабабли у ҳалок бўлди.
«Уни катта акула тишлаб олган, бироқ акуланинг тури бизга ҳозирча номаълум», — деди маҳаллий қутқарув маркази раҳбари Николас Рено. Ҳалок бўлган сёрфингчининг исми ошкор этилмаган. Унинг 50 ёшлар атрофида бўлганлиги ва Ғарбий Австралия штатида истиқомат қилганлиги маълум.
Бу Янги Каледонияда акулалар ҳужумидан кейин ўлим билан якунланган жорий йилдаги иккинчи ҳолатдир.
Изоҳ (0)