КХДРдан Жанубий Кореяга қочиб ўтганлар сони жорий йилнинг саккиз ойи мобайнида ўтган йилнинг шу даврига нисбатан 15 фоизга ошди. Бу ҳақда 7 сентябрь, чоршанба куни Корея Республикаси бирлашиш вазирлиги маълум қилди, дея хабар беради «ТАСС».
«Январдан августгача КХДРдан 894 киши қочиб келди. Ўтган йили бу кўрсаткич 777 кишини ташкил этганди. Ҳозирда мамлакатимиз ҳудудида КХДРнинг 29,6 минг собиқ фуқароси истиқомат қилмоқда. Яқин ойлар ичида уларнинг сони 30 мингдан ошиши кутилмоқда», — дея таъкидлади вазирлик мутасаддилари.
Яна бир жиҳати, илгари Шимолий Кореядан асосан аҳолининг камбағал ва камситиладиган қатламига мансуб кишилар қочган бўлса, бугунга келиб қочоқлар орасида ўзига тўқ тоифалар вакиллари кўп учрамоқда. Вазирлик маълумотларига кўра, 2014 йилдан кейин уларнинг сони қочоқларнинг 55 фоизини ташкил этди. Олдинлари бу рақам 20 фоизга ҳам етиб бормас эди.
Изоҳ (0)