5 сентябрь куни янги — «Тошкент — Андижон» электрлаштирилган темирйўли бўйлаб йўловчи поездларнинг мунтазам қатнови бошланди. Бу ҳақда ижтимоий тармоқларда фото- ва видеохабарлар қолдирилган.
«Потребитель.уз» гуруҳида қолдирилган хабарларга кўра, 8:05 да Тошкентдан йўлга чиққан поезд 14:05 да Андижонга етиб борган. Йўл давомида Поп, Қўқон ва Марғилон шаҳарларида тўхтаган.
Поезд 15:25 да Андижонда йўлга чиқиб, 21:25 да Тошкентга етиб келади. Фойдаланувчилар поезднинг тезлиги соатига 112 километрга етганини кўрсатувчи скриншотни илова қилган; қайд этишларича, поезд йўлнинг аксарият қисмида соатига 90 километр тезликда ҳаракатланган.
Фойдаланувчилар поезднинг бизнес-класси салонидан фотосуратларни ҳам улашган. Уларда қулай ўриндиқларни, ҳатто ёш болалар учун мўлжалланган махсус ўринларни кўриш мумкин.
Поездда егулик ва ичимликлар сотиб олиш мумкин, шунга қарамай, фойдаланувчилар поезднинг бўлажак йўловчиларини ўзи билан егулик олишга чақирган. Бу поездда тамаки чекиш ва спиртли ичимликлар ичиш тақиқланган.
«Умуман олганда, аъло даражадаги поезд, ажойиб саёҳат!», — деб фикр билдирган «Потребитель.уз»нинг поезд хизматидан фойдаланишга улгурган фойдаланувчилари.
«Potrebiteli.uz» сайти маълумотларига кўра, «Тошкент — Андижон» поездининг эконом-класси чипталари 45 минг сўм, бизнес-класс чипталари нархи эса 68 минг сўмга тенг. VIP-класс чипталари нархи 130 минг сўм тўлаш керак.Видео
Фото
«Ангрен — Поп» электрлаштирилган янги темир йўл линияси орқали «Тошкент — Андижон» йўналишидаги биринчи йўловчи поезди 27 август куни ҳаракатланган эди. «Ангрен — Поп» электрлаштирилган янги темир йўл линияси орқали юк поездларининг ўтиши эса 11 июлда бошланган. Қамчиқ довонидан ўтган темирйўл туннели бўйлаб ҳаракатга эса 22 июнь куни Ўзбекистоннинг Биринчи Президенти Ислом Каримов Хитой раҳбари Си Цзиньпин билан биргаликда старт берган эди.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)