«Арсенал» «Валенсия»дан Шкодран Мустафини, «Депортиво»дан Лукас Пересни ўз сафига қўшиб олди

Лондоннинг «Арсенал» футбол клуби трансфер ойнаси ёпилиши арафасида Ла Лиганинг икки аъзоси билан шартнома имзолади: Лукас Перес ҳамда Шкодран Мустафи. Бу ҳақда ҳаволада кўрсатилгани каби «Арсенал» клуби матбуот хизмати хабар берди.

Сўнгги мавсумни «Депортиво» сафида ўтказган испаниялик Лукас Перес фаолиятини «тўпчилар» сафида давом эттиради. 27 ёшли ҳужумчи ўтган мавсум Ла Лига доирасидаги 37 та ўйинда майдонга тушиб, 17 та гол уришга муваффақ бўлган. Ўша мавсум Лукас «Депортиво»нинг энг яхши тўпурарига айланган.

Бунга қадар «Валенсия» аъзоси ҳисобланган германиялик Шкодран Мустафи ҳам фаолиятини Лондон клубида давом эттирадиган бўлди. Германия миллий терма жамоаси ҳимоячиси ҳисобланган Мустафи «Валенсия»нинг Ла Лигадаги ўтган мавсумида 30 та ўйин ўтказди ва 2 та гол урди.

24 ёшли Мустафи «Арсенал» сафида тўп тепиб келаётган Пер Мертесакер, Месут Ўзил, Серж Гнабри каби йигитлардан кейин тўртинчи немис футболчисига айланди. Лукас Перес эса Начо Монреаль, Эктор Бельерин, Санти Касорладан кейин «тўпчилар»нинг тўртинчи испан аъзосидир.