“Arsenal” “Valensiya”dan Shkodran Mustafini, “Deportivo”dan Lukas Peresni o‘z safiga qo‘shib oldi

Londonning “Arsenal” futbol klubi transfer oynasi yopilishi arafasida La Liganing ikki a’zosi bilan shartnoma imzoladi: Lukas Peres hamda Shkodran Mustafi. Bu haqda havolada ko‘rsatilgani kabi “Arsenal” klubi matbuot xizmati xabar berdi.

So‘nggi mavsumni “Deportivo” safida o‘tkazgan ispaniyalik Lukas Peres faoliyatini “to‘pchilar” safida davom ettiradi. 27 yoshli hujumchi o‘tgan mavsum La Liga doirasidagi 37 ta o‘yinda maydonga tushib, 17 ta gol urishga muvaffaq bo‘lgan. O‘sha mavsum Lukas “Deportivo”ning eng yaxshi to‘purariga aylangan.

Bunga qadar “Valensiya” a’zosi hisoblangan germaniyalik Shkodran Mustafi ham faoliyatini London klubida davom ettiradigan bo‘ldi. Germaniya milliy terma jamoasi himoyachisi hisoblangan Mustafi “Valensiya”ning La Ligadagi o‘tgan mavsumida 30 ta o‘yin o‘tkazdi va 2 ta gol urdi.

24 yoshli Mustafi “Arsenal” safida to‘p tepib kelayotgan Per Mertesaker, Mesut O‘zil, Serj Gnabri kabi yigitlardan keyin to‘rtinchi nemis futbolchisiga aylandi. Lukas Peres esa Nacho Monreal, Ektor Belyerin, Santi Kasorladan keyin “to‘pchilar”ning to‘rtinchi ispan a’zosidir.