1.Ивуар, Франция
Ивуар қишлоғининг ёши 700 йилдан ошади. Урушлар ва табиий офатларга қарамай, қишлоқ ўзининг тарихий қиёфасини сақлаб қолган. Женева кўли яқинида Савой графи Амадей V томонидан қурилган кичик қаср жойлашган. Тош ётқизилган йўллар, шинам қадимий уйлар, бежирим гулзорлар… Бундай жой Франциянинг энг чиройли қишлоқлари уюшмасига кирмаслиги мумкин эмасди!
2.Кенгуру ороли, Австралия
Кенгуру оролини ҳам катталар, ҳам болаларни жалб қилувчи жойларга киритиш мумкин. Ҳудуднинг учдан бирини қўриқхона ва миллий боғлар ташкил қилади. Сизни улкан қоя ва яшил кенгликлар фонидаги азим манзаралар лол қолдиради. Бу ерда сайр чоғида кенгуру, эчкемар, коала, ўрдакбурун, шунингдек, турли қушларни учратиш мумкин. Океан сувларида эса дельфин ва тюленлар ўйноқлайди.
3.Буртанж қалъаси, Нидерландия
Буртанж қалъаси ёки «Юлдузли қалъа» мамлакат Испания империясидан мустақил бўлиб ажралиб чиқиш учун курашган Саксон йиллик уруш даврида қурилган. Меъморлар артиллериядан ҳимояланиш учун янги турдаги истеҳкомни ўйлаб топган. Урушдан кейин бастион ташлаб қўйилган, сўнг уни яна мустаҳкамлаб, кенгайтиришди.
4.Девоншир, Англия
Девон Англиядаги манзарали графлик бўлиб, Бристол кўрфази ва Ла-Манш бўғози билан ўралган. Қачонлардир бу ерда кельт халқи яшайдиган Думнония бўлган. Девон кўрфазларида курортлар, балиқчилик қишлоқлари ва портлар жойлашган. «Детективлар қироличаси» Агата Кристи айнан Девонда туғилган. Шунингдек, Артур Конан Дойлнинг «Баскервиллар ити» китобида ҳикоя қилинган воқеалар ҳам шу ерда содир бўлади. Бу ерда мамлакатнинг асл юзи фош бўлади ва унинг жиддий вазминлик, ранг-баранг ландшафтлар, шинам уйлар ва сирли йўллардан иборат қиёфасини кўришингиз мумкин.
5.Хоккайдо ороли, Япония
6.Монсанто, Португалия
Монсанто шаҳарчаси гранит валунлари (юмалоқ катта тош) ортига яширинган. Аммо манзара очилгач, тоғлар, ям-яшил ўтлоқлар, черепица томлар, тош йўлаклар сизни ҳайратда қолдиради. Қачонлардир Монсанто Бейра-Байша провинцияси маркази бўлган. Саккиз юз йил ичида маҳаллий ландшафт кўп ҳам ўзгаргани йўқ, шу туфайли, шаҳарча 1938 йилда «Португалияга энг хос бўлган қишлоқ» деб эътироф этилган. Бу ерда изғиб юришнинг ўзи ҳузур-ҳаловат бағишлайди, маҳаллий таомларни эса улкан тош остида жойлашган ресторанда татиб кўриш мумкин.
7.Хоббитон, Янги Зеландия
Фэнтези қишлоқ қўй фермасида бир йил ичида 400 кишининг кучи билан машҳур «Узуклар ҳукмдори» трилогиясини суратга олиш учун ташкил қилинган. Фильм устидаги ишлар якунлангач, қишлоқча бир қанча вақт бўш қолди. Аммо тез орада бу ерга асар мухлислари хоббитлар инларини, «Яшил аждар» паби, равоқсимон кўприк, тегирмон каби ҳақиқатга айлантирилган ранг-баранг объектларни ўз кўзлари билан кўришга кела бошлади.
8.Титикака кўли, Перу/Боливия
Маҳаллий аҳоли учун Титикака кўли — муқаддас. Унинг номи ҳиндулар тилида «тоғ пумаси» деган маънони англатади. Олимлар фикрича, кўл миллионлаб йиллар аввал қадимий денгиз бўлган: унинг сувларида ҳалигача денгиз балиқлари, қисқичбақасимонлар ва ҳатто акулалар сузиб юради, тоғ ёнбағирларида эса қирғоққа уриладиган тўлқинлар излари сақланган. Титикакуга 300 га яқин дарё келиб қуйилади. Шунингдек, кўлда қамишдан ясалган ва уру қабилалари яшайдиган ноодатий сузар оролларни кўриш мумкин. Ушбу кўчма қишлоқлардаги ҳаёт тарзи сўнгги асрлар ичида деярли ўзгармаган.
9.Гастелугаче ороли, Испания
Сан Хуан де Гастелугаче ороли Бискай кўрфази қирғоқларида жойлашган. Уни қитъа билан тор зина йўлак бирлаштиради, у 237 та пиллапоядан иборат. Оролда ёши қарийб 11 асрга тенг ибодатхона жойлашган. Гастелугаченинг ҳайратомуз манзараси бир умрга хотирангизга муҳрланади, кўм-кўк тўлқинлар ва мусаффо шамол эса кишини ўзгача энергия билан тўлдиради.
10.Шефшауэн, Марокаш
«Кўк шаҳарча» Шефшауэн Риф тоғлари ёнбағирлари бўйлаб жойлашган. Бу ерда гўзал манзаралар ҳам, қадимий меъморчилик ҳам, санъат асарлари ҳам кўзни қувнатади. Аммо эътиборга лойиқ асосий нарса — ҳайратомуз ранг! Кўк рангнинг оч ҳаворангдан тўқ мовий ранггача бўлган тусларини кўриш мумкин.
Изоҳ (0)