Har bir mamlakatning asl xarakterini ko‘rsatib beruvchi 10 ta joy (fotogalereya)

Dunyoning mashhur shaharlari sayyohlarga ko‘plab taassurotlar in’om etadi. Ammo har bir mamlakatda, xuddi teatrda bo‘lgani kabi, qandaydir muhim narsa sahna ortida qoladi. Poytaxtlardan uzoqlasharkanmiz, o‘zimiz uchun tub aholining odatlari, chiroyli mitti manzillar, o‘tgan asrlarning g‘aroyib inshootlari, ajoyib etnik uychalar va tabiatning hayratomuz burchaklarini kashf qilamiz. AdMe mamlakatning asl xarakterini ko‘rsatib beruvchi 10 ta provinsial manzillarga virtual sayohat qilishga taklif etadi.

1.Ivuar, Fransiya

Ivuar qishlog‘ining yoshi 700 yildan oshadi. Urushlar va tabiiy ofatlarga qaramay, qishloq o‘zining tarixiy qiyofasini saqlab qolgan. Jeneva ko‘li yaqinida Savoy grafi Amadey V tomonidan qurilgan kichik qasr joylashgan. Tosh yotqizilgan yo‘llar, shinam qadimiy uylar, bejirim gulzorlar… Bunday joy Fransiyaning eng chiroyli qishloqlari uyushmasiga kirmasligi mumkin emasdi!

2.Kenguru oroli, Avstraliya

Kenguru orolini ham kattalar, ham bolalarni jalb qiluvchi joylarga kiritish mumkin. Hududning uchdan birini qo‘riqxona va milliy bog‘lar tashkil qiladi. Sizni ulkan qoya va yashil kengliklar fonidagi azim manzaralar lol qoldiradi. Bu yerda sayr chog‘ida kenguru, echkemar, koala, o‘rdakburun, shuningdek, turli qushlarni uchratish mumkin. Okean suvlarida esa delfin va tyulenlar o‘ynoqlaydi.

3.Burtanj qal’asi, Niderlandiya

Burtanj qal’asi yoki “Yulduzli qal’a” mamlakat Ispaniya imperiyasidan mustaqil bo‘lib ajralib chiqish uchun kurashgan Sakson yillik urush davrida qurilgan. Me’morlar artilleriyadan himoyalanish uchun yangi turdagi istehkomni o‘ylab topgan. Urushdan keyin bastion tashlab qo‘yilgan, so‘ng uni yana mustahkamlab, kengaytirishdi.

4.Devonshir, Angliya

Devon Angliyadagi manzarali graflik bo‘lib, Bristol ko‘rfazi va La-Mansh bo‘g‘ozi bilan o‘ralgan. Qachonlardir bu yerda kelt xalqi yashaydigan Dumnoniya bo‘lgan. Devon ko‘rfazlarida kurortlar, baliqchilik qishloqlari va portlar joylashgan. “Detektivlar qirolichasi” Agata Kristi aynan Devonda tug‘ilgan. Shuningdek, Artur Konan Doylning “Baskervillar iti” kitobida hikoya qilingan voqealar ham shu yerda sodir bo‘ladi. Bu yerda mamlakatning asl yuzi fosh bo‘ladi va uning jiddiy vazminlik, rang-barang landshaftlar, shinam uylar va sirli yo‘llardan iborat qiyofasini ko‘rishingiz mumkin.

5.Xokkaydo oroli, Yaponiya

Yaponiyaliklar Xokkaydo orolida yorqin taassurotlar beruvchi ko‘plab joylarni yaratdi, bular — tog‘ cho‘qqisidagi balandliklar, lavanda dalalari, tog‘-chang‘i qiyaliklari va Moviy ko‘l. Yana, bu yerda faqat shu yerda yashaydigan jozibali jonivor — edzo momongani ko‘rish mumkin.

6.Monsanto, Portugaliya

Monsanto shaharchasi granit valunlari (yumaloq katta tosh) ortiga yashiringan. Ammo manzara ochilgach, tog‘lar, yam-yashil o‘tloqlar, cherepitsa tomlar, tosh yo‘laklar sizni hayratda qoldiradi. Qachonlardir Monsanto Beyra-Baysha provinsiyasi markazi bo‘lgan. Sakkiz yuz yil ichida mahalliy landshaft ko‘p ham o‘zgargani yo‘q, shu tufayli, shaharcha 1938-yilda “Portugaliyaga eng xos bo‘lgan qishloq” deb e’tirof etilgan. Bu yerda izg‘ib yurishning o‘zi huzur-halovat bag‘ishlaydi, mahalliy taomlarni esa ulkan tosh ostida joylashgan restoranda tatib ko‘rish mumkin.

7.Xobbiton, Yangi Zelandiya

Fentezi qishloq qo‘y fermasida bir yil ichida 400 kishining kuchi bilan mashhur “Uzuklar hukmdori” trilogiyasini suratga olish uchun tashkil qilingan. Film ustidagi ishlar yakunlangach, qishloqcha bir qancha vaqt bo‘sh qoldi. Ammo tez orada bu yerga asar muxlislari xobbitlar inlarini, “Yashil ajdar” pabi, ravoqsimon ko‘prik, tegirmon kabi haqiqatga aylantirilgan rang-barang obyektlarni o‘z ko‘zlari bilan ko‘rishga kela boshladi.

8.Titikaka ko‘li, Peru/Boliviya

Mahalliy aholi uchun Titikaka ko‘li — muqaddas. Uning nomi hindular tilida “tog‘ pumasi” degan ma’noni anglatadi. Olimlar fikricha, ko‘l millionlab yillar avval qadimiy dengiz bo‘lgan: uning suvlarida haligacha dengiz baliqlari, qisqichbaqasimonlar va hatto akulalar suzib yuradi, tog‘ yonbag‘irlarida esa qirg‘oqqa uriladigan to‘lqinlar izlari saqlangan. Titikakuga 300 ga yaqin daryo kelib quyiladi. Shuningdek, ko‘lda qamishdan yasalgan va uru qabilalari yashaydigan noodatiy suzar orollarni ko‘rish mumkin. Ushbu ko‘chma qishloqlardagi hayot tarzi so‘nggi asrlar ichida deyarli o‘zgarmagan.

9.Gastelugache oroli, Ispaniya

San Xuan de Gastelugache oroli Biskay ko‘rfazi qirg‘oqlarida joylashgan. Uni qit’a bilan tor zina yo‘lak birlashtiradi, u 237 ta pillapoyadan iborat. Orolda yoshi qariyb 11 asrga teng ibodatxona joylashgan. Gastelugachening hayratomuz manzarasi bir umrga xotirangizga muhrlanadi, ko‘m-ko‘k to‘lqinlar va musaffo shamol esa kishini o‘zgacha energiya bilan to‘ldiradi.

10.Shefshauen, Marokash

“Ko‘k shaharcha” Shefshauen Rif tog‘lari yonbag‘irlari bo‘ylab joylashgan. Bu yerda go‘zal manzaralar ham, qadimiy me’morchilik ham, san’at asarlari ham ko‘zni quvnatadi. Ammo e’tiborga loyiq asosiy narsa — hayratomuz rang! Ko‘k rangning och havorangdan to‘q moviy ranggacha bo‘lgan tuslarini ko‘rish mumkin.