Ўзбекистон вилоят марказлари орасида 24 август куни энг иссиғи Термиз шаҳри бўлди. «Ўзгидромет» маркази маълумотларига кўра (pdf), шу куни Сурхондарё вилояти маъмурий марказида ҳаво ҳарорати +36 даражагача кўтарилган.
Худди шундай ҳарорат Сурхондарё вилоятининг Шўрчи шаҳрида ҳам қайд этилган. «Ўзгидромет» ҳисоботига кўра, Ўзбекистоннинг бошқа ҳеч бир ҳудудида 24 август куни бундан юқори ҳарорати қайд этилмаган.
Айни вақтда, Урганч шаҳри 24 август куни Ўзбекистон йирик шаҳарлари ва вилоят марказлари орасида энг салқин бўлди — Хоразм вилояти маъмурий марказида чоршанба куни ҳаво ҳарорати +30 даражадан ошгани йўқ.
Энг салқин ҳаво, одатдагидек, Ўзбекистоннинг тоғли ҳудудларида кузатилган (Қамчиқ — +21 даража, Чимён — +24 даража илиқ). Шаҳар ва қўрғонлар орасида энг салқини Тошкент вилоятидаги Ангрен ва Жиззах вилоятидаги Лалмикор бўлди — бу икки аҳоли яшаш пунткида ҳаво ҳарорати +29 даражани ташкил этди.
24 август куни кундузи ва 25 августга ўтар кечаси Ўзбекистонда ёғингарчилик кузатилгани йўқ. Энг кучли шамоллар эса, сўнгги бир ҳафтага хос равишда, Қорақалпоғистон Республикаси ва Хоразм вилоятида кузатилди — Урганчда шамолнинг тезлиги сониясига 11 метрга, Нукусда 16 метрга, Жаслиқда эса 22 метрга етди.
Маълумот учун, 24 август куни Ўзбекистон вилоят марказлари ва йирик шаҳарларида ҳаво ҳароратининг энг юқори кўрсаткичи қуйидагича кўриниш олди: Нукусда +31 даража, Самарқанд, Жиззахда +32 даража, Тошкент, Бухоро, Навоий, Гулистон, Қарши, Наманганда +33 даража, Андижон, Фарғонада +34 даража.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)