Forbes 23 август, сешанба куни дунёнинг энг кўп ҳақ оладиган актрисалари рейтингини эълон қилди. Унда Голливуд юлдузи Женнифер Лоуренс биринчи ўринни эгаллади, деб маълум қилади «РБК».
Лоуренснинг охирги 12 ой мобайнидаги даромади 46 миллион долларни ташкил қилди.
Лоуренс кетма-кет икки йилдан буён рейтинг бошида турибди. Аммо ўтган йили унинг даромади бу йилгидан 11,5 фоизга кўпроқ бўлиб, 52 миллион долларни ташкил қилганди. 2016 йилда биринчиликни сақлаб қолишда актрисага «Очлик ўйинлари» франшизасининг охирги қисми прокатда қозонган муваффақият (касса йиғимлари — 653,4 миллион доллар) ҳамда йил охирида катта экранларга чиқадиган «Йўловчи» фильми учун аванс ёрдам берди.
Иккинчи ўринни 33 миллион натижа билан Мелисса Маккарти эгаллади. Ўтган йили иккинчи ўринни олган Скарлетт Йоханссон жорий йилда 25 миллион натижа билан Маккартидан ортда қолиб, учинчи ўрин билан кифояланди.
Ўнликка, шунингдек, америкалик Женнифер Энистон (21 миллион доллар), хитойлик Фань Бинбин (17 миллион доллар), АҚШ вакиллари Шарлиз Терон (16,5 миллион доллар), Эми Адамс (13,5 миллион доллар), Жулия Робертс (12 миллион доллар), Мила Кунис (11 миллион доллар) ва Болливуд юлдузи Дипика Падуконе (10 миллион доллар) кирди.
Изоҳ (0)