«АиФ» йўл ҳаракати қоидаларини бузган юқори мансабли қоидабузарлар билан таништирди.
Швециянинг 29 ёшли ўрта таълим ва касбий тайёргарлик вазири Аида Хажиалич йўл ҳаракати қоидаларини бир марта бузгани учун истеъфо берди. Уни маст ҳолда машина ҳайдагани учун жаримага тортишди, у бир неча қадаҳ вино ичганини тан олди. Шундан сўнг у лавозимини тарк этишга қарор қилди.
Ундан фарқли ўлароқ, Британия энергетика ва иқлим ўзгариши масалалари бўйича вазири Крис Хьюн 2012 йилда оддий йўл қоидасига риоя қилмагани учун ишдан ҳайдалди. Бунга тезликнинг бироз оширилгани эмас, балки амалдорнинг жавобгарликдан қочишга урингани сабаб бўлди. Ҳодиса тўққиз йил аввал содир бўлган, ўшанда вазир айбни ўз хотинига ағдарган, аммо улар ажрашгач, рафиқаси бор ҳақиқатни ошкор этган.
Ўтган йилнинг охирида Польша президенти Анжей Дуда Краковда автомобилини нотўғри парковка қилгани учун 100 злотий (тахминан 25 доллар) ҳажмидаги жаримага тортилди. Дуданинг машинасини унинг қизи бошқаргани маълум бўлди, у жаримани тўлаб, автомобилни бошқатдан парковка қилди.
Қозоғистон бош вазири Карим Масимов эса шу йил ёзда велопойгадаги суратини ижтимоий тармоққа жойлади. Эътиборли фойдаланувчилар мансабдор велосипедни автомагистралда ҳайдаётганига диққат қаратди, бу йўл ҳаракати қоидаларига зиддир. Полиция тезкорлик билан жавоб кўрсатиб, Масимовга 10 605 тенге жарима солди.
Ўтган йили Чеченистон раҳбари Рамзан Қодиров ҳам ижтимоий тармоқдаги ролиги туфайли йўл ҳаракати хавфсизлиги нозирлиги эътиборига тушди ва унга нисбатан тегишли чора кўрилди. Роликда Қодиров машина бошқараётиб, фарзандлари билан қўшиқ куйлагани акс этган, унда ҳеч ким хавфсизлик камарини тақмаган.
Юқорида тилга олинган амалдорлардан фарқли равишда, Рим папаси жаримадан қутулиб қолди. 2011 йилда Дортмунд фуқароси (ўшанда Рим папаси Бенедикт XVI эди) Рим папаси Германияда хавфсизлик камарини тақмаган ҳолда юргани ҳақида шикоят қилди. Аммо полициячилар Рим папасига расмий ташрифлар чоғида йўл ҳаракати қоидалари амал қилмаслигини айтди.
Изоҳ (0)