Россия Федерал хавфсизлик хизмати Қрим Республикаси ҳудудида Украина мудофаа вазирлигининг Разведка бош бошқармаси томонидан тайёрланган террорчилик актларининг олди олинганини маълум қилди. Бу ҳақда идоранинг матбуот хизмати хабар берди.
Терактларнинг объектлари сифатида ярим орол инфраструктурасининг энг муҳим унсурлари танлангани айтилмоқда. Диверсиялардан кўзланган мақсад — «федерал ва минтақавий ҳокимият органларига сайловларни тайёрлаш ва ўтказиш чоғида минтақада ижтимоий-сиёсий вазиятни издан чиқариш».
Хабарномада таъкидланишича, ўтказилган тезкор қидирув тадбирлари натижасида 6 августдан 7 августга ўтар кечаси Армянск шаҳри яқинида диверсантлар гуруҳи аниқланди. Уларни тутиш чоғида Россия хавфсизлик хизмати ходими ҳалок бўлди. Қуролли тўқнашув ҳудудида умумий қуввати тротил эквивалентида 40 килограммга тенг 20 та қўлбола портловчи ускуна, ўқ-дори, пиёдаларга қарши ва магнитли миналар, гранаталар ҳамда Украина қуролли кучлари махсус бўлинмаларининг қуролланишида бўлган махсус қурол-яроғлар топилди.
Бундан ташқари, хабарномага кўра, Қрим ярим оролида ўрнашган Украинага содиқ агентлик тармоғи йўқ қилинди. Террорчилик актларини тайёрлашда диверсантларга кўмак берган Украина ва Россия фуқаролари қўлга олинди. Асосий ташкилотчилардан бири сифатида Украина разведкаси ходими, 1977 йилда туғилган, Украинанинг Запорожье вилоятида истиқомат қилувчи Панов Евгений Александрович тилга олинмоқда. Таъкидланишича, айни пайтда ўз кўрсатмаларида у айбини тан олмоқда.
Россия махсус хизмати хабарномасида уқтирилишича, 8 августга ўтар кечаси Украина мудофаа вазирлигига қарашли махсус бўлинмаларининг яна икки диверсион гуруҳи ярим оролга ёриб киришга уринди, аммо бу хатти-ҳаракатлар Россия махсус кучлари томонидан бартараф этилди. Ёриб киришга уриниш чоғида Украина қуролли кучлари ўқотар қурол ва зирҳли техникадан ўт очгани айтилмоқда. Отишма чоғида россиялик бир ҳарбий ҳалок бўлди.
Юқоридаги воқеалар юзасидан жиноий иш қўзғатилди. Қўшимча тезкор тадбирлар ва тергов ҳаракатлари олиб борилмоқда.
Дам олиш масканларини, шунингдек, ҳаёт таъминоти ва инфраструктуранинг энг муҳим объектларини қўриқлаш бўйича қўшимча чоралар қабул қилинди. Украина сарҳадларида чегара назорати кучайтирилди.
Изоҳ (0)