8 август куни Ўзбекистон Савдо-саноат палатаси ва БМТ Тараққиёт дастурининг «Ўзбекистон бизнес форуми (3-босқич)» Ёшлар стартап-ташаббусларини қўллаб-қувватлаш дастури ўз ишини бошлади. Бу ҳақда лойиҳа матбуот хизмати «Дарё»га маълум қилди.
Унда махсус танловнинг учта босқичидан муваффақиятли ўтган 33 та жамоанинг ёшлар томонидан ишлаб чиқилган стартап ташаббусларни қўллаб-қувватлашга йўналтирилган уч ойлик дастурда иштирок этиши кутилмоқда.
Дастурга АКТ ва маълумот хавфсизлиги, қишлоқ хўжалиги, транспорт ва йўл инфратузилмаси, тиббиёт, молия ва тўлов тизимлари, «ақлли уй», текстиль ва мода, Internet of Things («Нарсалар интернети»), ресторан бизнеси, таълим, ҳуқуқшунослик ва бошқа шу каби соҳаларга тааллуқли лойиҳалар киритилди.
Ёш стартап лойиҳачиларни ниҳоятда бой, кенг кўламли дастур кутмоқда. Ушбу дастур доирасида «камчиқим стартап» (Lean Startup) услубияти, лойиҳани ривожлантириш борасида махсус йўл харитасини тузиш, прототип яратиш, дастлабки сотувларни ташкил этиш кабилар ҳақида маълумот берилади. Дастур жараёнида иштирокчилар «трекерлар» (яъни, жамоанинг ривожланишини кузатувчи ва жамоа олдига қўйилган мақсадларга эришиш масалалари бўйича унга тегишли тавсиялар берувчи тажрибали устозлар) билан маслаҳатлашиши ҳамда ҳар ҳафталик «трекшн-учрашувлар», яъни «трекерлар» билан лойиҳа ривожланиши масалаларини муҳокама этиш учун ташкил этиладиган йиғилишларда қатнашиб, ўз хатоларини белгилаши, уларни ўрганиб бартараф этиш имконига эга бўлади.
Мазкур уч ойлик дастур якунлари асосида лойиҳа муаллифлари ўз ишларини Demo Day, яъни тақдимот кунида потенциал сармоядорларга, инвесторларга тақдим этиши кутилади.
Эслатиб ўтиш лозимки, ушбу дастурга танлов жорий йилнинг бошида очиқ деб эълон қилинган эди. Дастур очилишидан уч ой ўтар-ўтмас Тошкент шаҳри ва Ўзбекистоннинг бошқа вилоятларидаги 33 та олий таълим муассасасидан 308 та ариза қабул қилинди. Дастлабки танлов натижалари асосида 196 лойиҳа танлаб олиниб, ушбу лойиҳа муаллифлари билан суҳбат ўтказилди.
Изоҳ (0)