«Ўзбекистон ҳаво йўллари» Миллий авиакомпанияси Ўзбекистон мустақиллигининг 25 йиллиги шарафига ўз йўловчилари учун бир қатор акциялар ва совғалар тайёрлаган. Бу ҳақда «Ўзбекистон ҳаво йўллари» матбуот хизмати хабар бермоқда.
Boeing 787 Dreamliner самолёти
Авиакомпания янги русумдаги иккита Boeing 787 Dreamliner самолётларини ишга туширишга тайёргарлик кўрмоқда. Самолётлардан бири Ўзбекистонга мустақилликнинг 25 йиллигини нишонлаш кунларида етиб келади.
Қўшимча бонуслар
«Ўзбекистон ҳаво йўллари» Миллий авиакомпаниясида 2001 йил 1 январидан буён доимий парвоз қилувчи ҳамда Uzairplus дастури иштирокчиси бўлган йўловчиларнинг ҳар бири авиакомпаниядан унинг номига ёзилган табрикнома олади. Совға сифатида эса Premium, Silver ва Gold карталарига қўшимча бонус баллари қўшилади.
Мустақиллик тенгдошлари
1991 йил 1 сентябрда туғилганлар «Ўзбекистон ҳаво йўллари» МАК томонидан маҳаллий йўналишларга бепул авиачипта олиши мумкин. Таклиф Ўзбекистон Республикаси чегарасида 1 сентябридан 31 октябригача бўлган давр ичида амалга ошириладиган исталган қатновга татбиқ этилади. 1991 йил 1 сентябрда таваллуд топганлар 1 августдан бошлаб совға тариқасида тақдим этиладиган авиачиптани қўлга киритиш учун «Ўзбекистон ҳаво йўллари» МАКнинг авиачипталарни сотиш шохобчаларига мурожаат қилиши керак бўлади.
Авиачипта ютуғи
Uzbekistan Airways’нинг Facebook’даги саҳифасида республика ичидаги йўналишларга бепул авиачипта ўйналади. Унда иштирок этиш учун авиакомпания саҳифасига обуна бўлиш ва чипта ўйналиши ҳақидаги эълонни дўстлари билан ўртоқлашиши керак бўлади. Чипта ўйналиши 15 августда бошланади ва 24 август соат 00:00 гача давом этади. Соврин ғолиби 26 август куни соат 10:00 да, «Random.org» тасодифий рақамлар генератори дастури ёрдамида, махсус комиссия ва ОАВ вакиллари иштирокида аниқланади. Ғолиб республика ичидаги йўналишлар бўйича битта бепул авиачиптага сертификатни қўлга киритади.
Байрам кунида
1 сентябрь куни «Ўзбекистон ҳаво йўллари» МАК қатновларида парвоз қиладиган барча йўловчиларга ҳаво кемаси бортида эсдалик сувенирлари топширилади. Борт кузатувчилари йўловчиларга тарихий воқеа хотирасига авиакомпания логотипи ва мустақиллик рамзи туширилган сувенирларни тақдим этади.
Изоҳ (0)