Tesla Motors компанияси АҚШнинг Невада штатида қурилаётган «Гигафабрика»сини очди. Завод автомобиль ишлаб чиқарувчининг барча моделлари, шунингдек, Tesla’нинг бошқа лойиҳалари учун литий-ионли аккумуляторлар ишлаб чиқаради. Бу ҳақда Motor хабар бермоқда.
Заводнинг Tesla мижозлари учун тайёрланган расмий тақдимоти 29 июлга мўлжалланган бўлиб, ушбу санадан уч кун аввал тадбирга журналистлар таклиф қилинган.
ОАВларда таъкидланишича, «Гигафабрика»нинг ҳудуди ва қурилиши 14 фоизга тайёр. Шунга қарамасдан, Powerwall стационар зарядловчи қурилмаси учун батареяларнинг синов учун ишлаб чиқарилиши аллақачон бошланган.
Заводга ташриф буюрган журналистлар кўплаб роботлаштирилган техникаларга эътибор қаратди. Қурилмаларнинг кўпчилиги ҳали ишга туширилмаган, қурилиш деярли бошланғич босқичида бўлишига қарамасдан, Tesla йил охирига қадар тўлиқ ишлаб чиқаришни бошлашни режалаштирмоқда.
Маълумотларга қараганда, 2017 йилнинг иккинчи ярмига келиб «Гигафабрика» 31 фоизга тайёр бўлади. Шунга қарамасдан, компания завод туфайли 2018 йилга келиб автомобиль ишлаб чиқаришнинг йиллик ҳажмини 50 мингтадан 500 минггача етказишни режалаштирмоқда. Уч йилдан кейин эса корхонада 10 минг нафаргача киши ишлайди.
«Гигафабрика»нинг қурилиши тўлиқ якунланганда, унинг майдони 930 минг квадрат метр ёки 262 та футбол майдонига тенг бўлади.