Обама: АҚШнинг Туркиядаги фитнага алоқадорлиги ҳақидаги даъволар икки томонлама алоқаларга путур етказади

АҚШнинг Туркияда содир бўлган давлат тўнтаришига уринишига ҳеч қандай алоқаси бўлмаган ва бунинг аксини таъкидлайдиган ҳар қандай даъволар Вашингтон ва Анқаранинг икки томонлама алоқаларига салбий таъсир ўтказади. Бу ҳақда АҚШ президенти Барак Обама мексикалик ҳамкасби Энрике Пенья Ньето билан қўшма матбуот анжуманида нутқ сўзлар экан маълум қилди, деб ёзади «ТАСС».

Обаманинг сўзларига кўра, унинг мамлакати Туркиянинг қонуний ҳукуматини «ағдаришга бўлган ҳар қандай уринишларни қатъий рад қилади». «Вашингтон Анқарадаги демократик ҳукуматни қўллаб-қувватлайди», — дея таъкидлади АҚШ президенти.

Унинг ишонтиришича, АҚШ Туркияда исёнчиларнинг тайёргарликлари ҳақида билгани ёки уларнинг фаолиятига алоқадор бўлгани ҳақидаги «ҳар қандай хабарлар бутунлай ёлғон» ҳисобланади.

Обама ушбу маълумотни яқинда бўлиб ўтган телефон суҳбати чоғида Туркия президенти Тоййиб Эрдўғонга етказганини айтди. Шу билан бирга, Америка етакчиси суҳбатдошини Туркияда янграётган АҚШнинг фитнага алоқадорлиги ҳақидаги айбловлар Вашингтон ва Анқаранинг алоқаларига путур етказаётгани ҳақида огоҳлантирди.