Google компанияси сунъий интеллект ёрдамида чуқур машина таълими соҳасида тадқиқотчилик фаолияти билан шуғулланувчи DeepMind лабораториясини сотиб олишга кетган харажатларни қисман қоплашга муваффақ бўлди, деб ёзади N+1.
Компания мутахассислари нейротармоқдан ўз дата-марказлари энергия самарадорлигини бошқаришда фойдаланди. Ушбу нейротармоқ 120 га яқин параметрларни бошқаради. Хусусан, сунъий интеллект серверлар ва турли ускуналарнинг энергия истеъмолини, совутиш тизими ишини бошқаради ва ҳатто, деразаларни очиб-ёпа олади.
DeepMind асосчиларидан бири Демис Хассабис таъкидлашича, бундай ечим дата-марказларнинг энергия истеъмолини бир неча фоизга қисқартириб, уларнинг энергия самарадорлигини 15 фоизга оширди.
2014 йилда Google 4 402 836 мегаватт/соат электр энергиясини сарфлаган, шунинг каттагина қисми дата-марказларни энергия билан таъминлашга кетган. Сарфланаётган электр энергиясининг ўн фоизи тежалган тақдирда ҳам, Google бир неча йил ичида юзлаб миллион доллар тежаб қолиши мумкин. DeepMind’ни сотиб олишга эса, қарийб 600 миллион доллар харжланган.
Изоҳ (0)