Халқаро олимпия қўмитаси ижроия қўмитасининг 19 июль куни ўтказилган телефон конференцияси якунларига кўра Россияга ишончсизлик билдириш ва мамлакатда халқаро мусобақаларнинг ташкил этилишини қўллаб-қувватламаслик қарори қабул қилинди. Бу ҳақда «Спорт Экспресс» хабар бермоқда.
Эслатиб ўтамиз, кеча, 18 июль куни WADA мустақил комиссиясининг 2014 йилги Сочи Олимпиадасида йўл қўйилган допинг қаллобликлари юзасидан якуний ҳисоботи эълон қилинди. Унда, жумладан, қаллобликларга Россиянинг кўпгина йирик давлат мансабдорлари алоқадорлиги айтилди. Шу муносабат билан Халқаро олимпия қўмитасининг шошилинч йиғилиши ўтказилди.
Йиғилишда, шунингдек, қишки спорт турлари бўйича Халқаро федерацияларга Россияда ўтадиган барча йирик турнирларга (жаҳон чемпионатлари, Жаҳон кубоги босқичлари) тайёргарлик кўришни музлатиб қўйиш ва бошқа ташкилотчиларни топиш тавсия этилди.
Изоҳ (0)