Икки карра Олимпиада чемпиони Елена Исинбаева, Дарья Клишинадан ташқари россиялик барча енгил атлетикачилар халқаро мусобақалар, жумладан, Олимпия ўйинларига қўйилмаслиги маълум бўлгач, Енгил атлетика федерациялари халқаро ассоциациясини (IAAF) тарқатиб юборишга чақирди. Бу ҳақда TJournal хабар бермоқда.
«Бу федерацияни тарқатиб юборган, раҳбариятини эса яна бир бор алмаштирган бўлардим. Ташкилот самарали эмас, дунё енгил атлетикасини барбод қиляпти. Ҳамма яхши тушуниб турибди: россияликларни ўйинларга қўйишмаса, трансляцияларни Олимпиада телеаудиториясини ярми кўради, холос. Бу эса ҳомийлар учун, бизнинг чиқишларимизни кутаётган дунё ҳамжамияти учун ёмон», — деди Исинбаева.
Ассоциация тарқатиб юборилиши ҳақидаги фикрни Россия спорт вазири Виталий Мутко ҳам қўллаб-қувватлади.
«IAAF — собиқ президенти тергов остида бўлган, унинг даврида ишлаган вице-президент ва допинг сиёсатини юритган кишилар эса ўз ўрнида қолган ташкилот. Энди улар бизни муҳокама этиб, тарбиялашга, нималарнидир ўргатишга ҳаракат қилмоқда. Бундан уялиш керак аслида», — деб киноя қилди Мутко.
Вазирнинг айтишича, агар Лозаннадаги спорт арбитраж суди россиялик енгил атлетикачилар бўйича даъвони қондирмаса, Россия фуқаролик судига мурожаат этади. Ишнинг кўриб чиқилиши 19 июлга белгиланган.
Изоҳ (0)