Қиз бола турмушга чиққанидан сўнг аксарият ҳолларда турмуш ўртоғининг фамилиясига ўтади. Аммо у эл назаридаги таниқли ижодкор бўлса бунга кўнадими ёки фамилиясида қолишни маъқул кўрадими? «Ҳордиқ» газетаси ушбу савол билан айрим ижодкор аёлларга мурожаат этди, деб ёзади «Даракчи.uz».
Мадина Мумтоз: «Қизлик фамилиям Мусаева бўлишига қарамай, кўпчилик Мумтоз тахаллусим орқали танийди. Турмушга чиққач, турмуш ўртоғимнинг фамилиясига ўтишга қарор қилдим. Чустий деган камёб ва ноодатий фамилиям ҳалигача кўпчиликни ҳайратга солади. Негадир кўпчилик бу фамилияни тахаллус деб ўйлайди».
Шодия Тўхтаева: «Барча қизлар сингари турмушга чиққач, турмуш ўртоғимнинг фамилиясига ўтдим. Ҳозир фамилиям Тўхтаева эмас, балки Абдуқодирова. Менимча, ижодда исм-фамилиянинг аҳамияти йўқ, фамилиям ўзгаргани билан ҳамон ўша-ўша Шодияман».
Паризода: «Мен ҳам турмушга чиққач, турмуш ўртоғимнинг фамилиясини қабул қилдим. Ҳозирги фамилиям Сафарова. Тахаллус билан ижод қилганим боис, ҳеч ким қизлик фамилиямни билмайди. Фамилиямни ўзгартирганим ҳеч қандай муаммо ва чалкашликларга сабаб бўлмади. Кейин Сафарова деган фамилия ҳам ёмон жарангламайди».
Муҳаббат Қурбонова: «Илгарилари турмушга чиқсам, албатта турмуш ўртоғимнинг фамилиясига ўтаман, деб орзу қилардим. ФҲДЁ бўлимига ариза бераётганда, ҳеч иккиланмай, фамилиям ўзгаришига рози бўлганман. Ҳозирги фамилиям Ғуломова. Аммо фамилиям ўзгарганини айтган бўлсам-да, исмимни эълон қилишаётганда ҳалигача Муҳаббат Қурбонова деб саҳнага таклиф этишади. Янги фамилиям билан чақириш ноқулай бўляпти, шекилли».
Изоҳ (0)