Ўзбекистонда хизмат кўрсатган артист Раъно Ярашева 15 июнь куни ҳуқуқни муҳофаза қилиш органлари томонидан қўлга олинган чинозлик Аҳмадбойга икки баробар кўпайтириб бериш шарти билан 50 минг АҚШ доллари бергани ҳақидаги хабарларни рад этиб чиқди. Бу ҳақда «Qalampir.uz» хабар бермоқда.
«Мен Аҳмадбой ҳақида умуман эшитмаганман, ҳатто, телевидение орқали намойиш этилган кўрсатувни кўрганим ҳам йўқ. Қўл телефоним тинмаяпти, таниш-билишлар кўнгил сўраб қўнғироқ қилишяпти. Одамларга ҳайронман, кўрмаган, билмаган нарсаси ҳақида бундай гапларни қандай ўйлаб топишаркин?!», — деди Раъно Ярашева.
«Фарзандларимни ҳалол меҳнатим билан боққанман. Судхўрлик энг оғир гуноҳ ва жиноят. Қўлимда шунча пулим бўлганида, етти ёт бегонанинг қўлига олиб бориб берган бўлармидим?! Аҳмадбой ким экан, деб суриштирсам, кўпчиликнинг алданиб, пулини олдириб қўйганини эшитдим. Бу ерда энг асосий айбдор — одамларнинг ўзи», — деди актриса.
«Пешона териси билан топган пулини судхўрнинг қўлига тутқазган одамларни ҳеч қачон оқламайман», — деди Раъно Ярашева.
Айни вақтда, «Qalampir.uz»нинг қайд этишича, Раъно Ярашева санъаткорлар ҳақида ёлғон маълумотлар тарқатиб, шубҳа ва гумонлар остида қолишига сабабчи бўлаётган айрим кимсаларни топишда ҳуқуқ-тартибот органларидан ёрдам сўраган.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)