Qiz bola turmushga chiqqanidan so‘ng aksariyat hollarda turmush o‘rtog‘ining familiyasiga o‘tadi. Ammo u el nazaridagi taniqli ijodkor bo‘lsa bunga ko‘nadimi yoki familiyasida qolishni ma’qul ko‘radimi? “Hordiq” gazetasi ushbu savol bilan ayrim ijodkor ayollarga murojaat etdi, deb yozadi “Darakchi.uz”.
Madina Mumtoz: “Qizlik familiyam Musayeva bo‘lishiga qaramay, ko‘pchilik Mumtoz taxallusim orqali taniydi. Turmushga chiqqach, turmush o‘rtog‘imning familiyasiga o‘tishga qaror qildim. Chustiy degan kamyob va noodatiy familiyam haligacha ko‘pchilikni hayratga soladi. Negadir ko‘pchilik bu familiyani taxallus deb o‘ylaydi”.
Shodiya To‘xtayeva: “Barcha qizlar singari turmushga chiqqach, turmush o‘rtog‘imning familiyasiga o‘tdim. Hozir familiyam To‘xtayeva emas, balki Abduqodirova. Menimcha, ijodda ism-familiyaning ahamiyati yo‘q, familiyam o‘zgargani bilan hamon o‘sha-o‘sha Shodiyaman”.
Parizoda: “Men ham turmushga chiqqach, turmush o‘rtog‘imning familiyasini qabul qildim. Hozirgi familiyam Safarova. Taxallus bilan ijod qilganim bois, hech kim qizlik familiyamni bilmaydi. Familiyamni o‘zgartirganim hech qanday muammo va chalkashliklarga sabab bo‘lmadi. Keyin Safarova degan familiya ham yomon jaranglamaydi”.
Muhabbat Qurbonova: “Ilgarilari turmushga chiqsam, albatta turmush o‘rtog‘imning familiyasiga o‘taman, deb orzu qilardim. FHDYo bo‘limiga ariza berayotganda, hech ikkilanmay, familiyam o‘zgarishiga rozi bo‘lganman. Hozirgi familiyam G‘ulomova. Ammo familiyam o‘zgarganini aytgan bo‘lsam-da, ismimni e’lon qilishayotganda haligacha Muhabbat Qurbonova deb sahnaga taklif etishadi. Yangi familiyam bilan chaqirish noqulay bo‘lyapti, shekilli”.
Izoh (0)