Буюк Британия ҳукумати Евроиттифоқдан чиқиш ҳақидаги референдумни қайтадан ўтказиш тўғрисидаги петицияни рад этди. Шу пайтга қадар мурожаатни 4,126 миллион киши имзолаб улгурган эди, деб хабар беради «РБК».
Мурожаат муаллифлари ҳукуматдан янги меъёрларни киритиб, референдумда сайловчиларнинг камида 75 фоизи иштирок этишини белгилаб қўйишни сўраган эди. Агар сайловчиларнинг 75 фоизидан камроғи иштирок этса ва ҳеч бир томон 60 фоиздан кўп овоз тўплай олмаса, унда референдум қайтадан ўтказилиши лозим.
Ҳукумат тайёрлаган жавобда бош вазир Дэвид Кэмероннинг референдумга берган баҳоси келтирилади. Унинг фикрича, Brexit юзасидан ўтказилган референдум мамлакат тарихидаги энг муҳим демократик тажрибалардан бири бўлиб, унда 33 миллион киши иштирок этди. Референдум тўғрисидаги қонун барча даражалардан ўтди, жумладан, жамоат палатаси ва лордлар палатасида кўриб чиқилди. Қонунда референдум тартиби белгилаб берилган бўлиб, у ташриф минимумини ҳам, овозлар мувозанати бўйича чекловларни ҳам кўзда тутмайди.
Петиция Буюк Британия парламентида ҳам кўриб чиқилмайди.
Изоҳ (0)