OLX интернет-эълонлар сервиси Ўзбекистонда фойдаланилган машиналар орасида энг кўп сотилаётган автомобиллар рейтингини эълон қилди. Унга кўра, Chevrolet моделлари, хусусан, Spark русумли автомобиллар энг кўп сотилаётгани маълум бўлди. Бу ҳақда OLX «Дарё» нашрига маълум қилди.
Рейтингни тузишда OLX интернет-эълонлар сервисининг 2016 йил январидан май ойигача бўлган оралиқда амалга оширилган ёпиқ келишув маълумотларидан фойдаланилди. Истеъмолда бўлган машиналар орасида энг кўп сотилаётган автомобиллар рейтингида иккинчи ўринни Chevrolet Nexia, учинчи ўринни Chevrolet Matiz эгаллади.
Chevrolet автомобиллари машҳурлиги бўйича ҳам етакчиликни сақлаб турибди. Сотиб олинган машиналарнинг 46 фоизини Chevrolet, 19 фоизини «ВАЗ», 12 фоизини Daewoo ташкил этди.
Енгил автомобиллар асосан Тошкент шаҳри ва Тошкент вилоятида сотиб олинган. Амалга оширилган келишувларнинг 97 фоиз улуши айнан шу ҳудудда истиқомат қилувчи аҳолига тўғри келмоқда. Машина сотиб олишнинг энг кам кўрсаткичи Қашқадарё, Сурхондарё, Сирдарё ва Хоразм вилоятлари аҳолиси томонидан қайд этилди.
Изоҳ (0)