OLX internet-e’lonlar servisi O‘zbekistonda foydalanilgan mashinalar orasida eng ko‘p sotilayotgan avtomobillar reytingini e’lon qildi. Unga ko‘ra, Chevrolet modellari, xususan, Spark rusumli avtomobillar eng ko‘p sotilayotgani ma’lum bo‘ldi. Bu haqda OLX “Daryo” nashriga ma’lum qildi.
Reytingni tuzishda OLX internet-e’lonlar servisining 2016-yil yanvaridan may oyigacha bo‘lgan oraliqda amalga oshirilgan yopiq kelishuv ma’lumotlaridan foydalanildi. Iste’molda bo‘lgan mashinalar orasida eng ko‘p sotilayotgan avtomobillar reytingida ikkinchi o‘rinni Chevrolet Nexia, uchinchi o‘rinni Chevrolet Matiz egalladi.
Chevrolet avtomobillari mashhurligi bo‘yicha ham yetakchilikni saqlab turibdi. Sotib olingan mashinalarning 46 foizini Chevrolet, 19 foizini “VAZ”, 12 foizini Daewoo tashkil etdi.
Yengil avtomobillar asosan Toshkent shahri va Toshkent viloyatida sotib olingan. Amalga oshirilgan kelishuvlarning 97 foiz ulushi aynan shu hududda istiqomat qiluvchi aholiga to‘g‘ri kelmoqda. Mashina sotib olishning eng kam ko‘rsatkichi Qashqadaryo, Surxondaryo, Sirdaryo va Xorazm viloyatlari aholisi tomonidan qayd etildi.
Izoh (0)