Оғир атлетика бўйича Ўзбекистон аёллар терма жамоасига Рио–2016 Олимпиадаси учун берилган ягона йўлланма 2013 йилда ўзбекистонлик аёл спортчилар антидопинг қоидаларини бузганлиги аниқланганлиги учун Халқаро оғир атлетика федерацияси томонидан олиб қўйилди. Бу ҳақда Ўзбекистон оғир атлетика федерацияси раисининг биринчи ўринбосари Шаҳрилло Маҳмудов ушбу федерация матбуот хизматига берган интервьюсида маълум қилди.
Жорий йилнинг 21–30 апрель кунлари Тошкентда бўлиб ўтган Осиё чемпионати якунларига кўра, Ўзбекистон аёллар терма жамоаси Рио–2016 Олимпиадасига 1 та йўлланма олганди. Халқаро оғир атлетика федерациясининг расмий сайтида антидопинг қоидаларини бузиш бўйича берилган ахборотда Ўзбекистон икки бор тилга олинганди. Шу кунларда Грузия пойтахти Тбилиси шаҳрида бўлиб ўтаётган ёшлар ўртасидаги жаҳон чемпионати доирасида ўтказилган Халқаро оғир атлетика федерацияси Ижроия қўмитасининг йиғилишида бир қатор масалалар билан бирга допинг муаммоси ҳам кўтарилди.
«Тан олиш керак, мазкур воқеалар ўзбек оғир атлетикасига ҳам салбий таъсир кўрсатмай қолмади. Аммо қатъий айтаман, ваҳима қилишга, шов-шув кўтаришга мутлақо асос йўқ. Маълумки, бундан бирмунча вақт олдин барча Олимпия турлари қатори, оғир атлетикада ҳам сўнгги икки Олимпиада – Пекин (2008 йил) ва Лондон (2012 йил) ўйинларида қатнашган спортчилардан олинган допинг пробаларни қайта текширувдан ўтказиш кампанияси бошланди. Албатта, бу текширув оғир атлетикачиларни ҳам четлаб ўтмади. Шундан кейин Халқаро оғир атлетика федерацияси Ижроия қўмитасининг Грузияда, жаҳон чемпионатидан олдин бўлиб ўтадиган навбатдаги йиғилиши кун тартибига асосий масалалардан бири сифатида ‘Допингга қарши кураш муаммоси’ қўйилди.
Тан оламан, ўтган 8 йил давомида бизнинг спортчиларда ҳам эҳтиётсизлик оқибатида ман этилган тиклантирувчи воситалардан фойдаланилган ҳолатлар рўй берган. Бунинг учун федерация ўз зиммасидаги масъулиятни ҳис қилади ва бундан буён допингга қарши муросасиз курашга тайёр. Хуллас, ўтган давр ичида йўл қўйилган камчиликлар учун, хусусан, 2013 йил давомида бир неча ёш спортчиларимиздан олинган таҳлиллар натижасига кўра, бир неча давлатлар қаторида Ўзбекистондан ҳам аёллар учун берилган ягона квотани олиб қўйиш ҳақида қарор чиқарди.
Маълумки, оғир атлетикада Олимпия йўлланмалари муайян бир спортчига берилмайди, жамоага берилади. Демак, лицензиялардан маҳрум қилиниш чораси ҳам бирон-бир атлетга эмас, балки, жамоанинг ўзига нисбатан қўлланилади. Бизнинг Олимпиадага бориши мумкин бўлган ҳеч бир спортчимиз допингга тушгани йўқ. Уларнинг ҳеч бири халқаро мусобақалардан дисквалификация қилинмайди. Етакчи спортчиларимиз бемалол нуфузли халқаро мусобақаларда иштирок этаверади. Фақат аёллар жамоамизнинг Олимпиада йўлланмаси олиб қўйилди, холос. Ўйлайманки, бу жазо биз учун у қадар кучли руҳий зарба бўла олмайди. Эркаклар жамоамизнинг 5 та йўлланмаси ўз жойида турибди. Олимпиадада эса биз асосан йигитларимиздан юқори натижалар кутиб турибмиз.
Озарбайжон, КХДР, Молдова, Руминия каби давлатлар ҳам жазоланганлар рўйхатида бор. Ҳозиргача қўлланилган жазо чораларидан оғир атлетика ривожланган ҳеч бир давлат бебаҳра қолгани йўқ. Шунинг учун ҳам Ўзбекистон терма жамоасидан битта қизлар йўлланмаси олиниши адолатли ва оғир оқибатларга олиб келмайдиган қарор.
Қисқача хулоса қиладиган бўлсам, Халқаро оғир атлетика федерацияси томонидан қўлланилган жазо чораларидан кўзланган асосий мақсадлар иккита. Биринчиси – Халқаро оғир атлетика федерациясининг Халқаро Олимпия Қўмитаси ва Бутунжаҳон допингга қарши кураш агентлиги (WADA) томонидан олиб борилаётган аксилдопинг сиёсатини ёқлаш ва бу жараёнда фаол иштирок этиш. Шу орқали оғир атлетиканинг Олимпия ўйинлари дастуридаги, Олимпия оиласидаги ўрнини сақлаб қолиш ва мустаҳкамлаб бориш. Иккинчиси – оғир атлетика ривожланган давлатлардан олиб қўйилган квоталар (лицензиялар)ни энди ривожланиб келаётган мамлакатлар ўртасида тақсимлаш ва шу орқали оғир атлетиканинг барча қитъалар, бутун ер юзи бўйлаб оммавийлашиб боришига эришиш. Масалан, жазоланган жамоалардан олинган лицензиялар – 24 та квота Осиёнинг Ироқ, Шри-Ланка каби, шунингдек, Африканинг бир қатор давлатларига бўлиб берилди», – деди Шаҳрилло Маҳмудов.
Изоҳ (0)