БМТ бош котиби Пан Ги Мун Ироқ бош вазири Ҳайдар ал-Ободий билан телефон орқали суҳбатлашиб, уни стратегик жиҳатдан муҳим бўлган Ал-Фаллужа шаҳри ИШИД террорчилик гуруҳи қўлидан озод этилгани муносабати билан табриклади, деб ёзади «ТАСС» бош котиб канцеляриясига таяниб.
«Бош котиб туманларни ИШИД қўлидан озод этиш бўйича Ироқ хавфсизлик кучлари томонидан эришилган прогрессни маъқуллади. У БМТ Ироқ ҳукуматига Ал-Фаллужа тинч аҳолисининг гуманитар эҳтиёжларини қондиришда ёрдам бериш устида ишлаётганини таъкидлади», — дейилади хабарда.
Пан Ги Мун, шунингдек, шаҳарни тарк этган одамларга зулм ўтказилаётгани ҳақидаги хабарлар юзасидан хавотир билдириб, Ироқ бош вазирининг инсон ҳуқуқлари бузилиши ҳолатларини текшириш учун қўмита ташкил қилиш қарорини маъқуллади.
26 июнь куни Бағдод Ал-Фаллужанинг экстремистлардан тўлиқ озод этилганлигини расман эълон қилди. Ҳукумат кучларининг Ал-Фаллужада террорчилар билан бир ойга яқин давом этган жанглар давомида ўн минглаб маҳаллий аҳоли шаҳардан қочиб чиқди. Тўқнашувларда бир неча минг жангари ўлдирилганлиги маълум қилинди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)