BMT bosh kotibi Pan Gi Mun Iroq bosh vaziri Haydar al-Obodiy bilan telefon orqali suhbatlashib, uni strategik jihatdan muhim bo‘lgan Al-Falluja shahri IShID terrorchilik guruhi qo‘lidan ozod etilgani munosabati bilan tabrikladi, deb yozadi “TASS” bosh kotib kanselyariyasiga tayanib.
“Bosh kotib tumanlarni IShID qo‘lidan ozod etish bo‘yicha Iroq xavfsizlik kuchlari tomonidan erishilgan progressni ma’qulladi. U BMT Iroq hukumatiga Al-Falluja tinch aholisining gumanitar ehtiyojlarini qondirishda yordam berish ustida ishlayotganini ta’kidladi”, — deyiladi xabarda.
Pan Gi Mun, shuningdek, shaharni tark etgan odamlarga zulm o‘tkazilayotgani haqidagi xabarlar yuzasidan xavotir bildirib, Iroq bosh vazirining inson huquqlari buzilishi holatlarini tekshirish uchun qo‘mita tashkil qilish qarorini ma’qulladi.
26-iyun kuni Bag‘dod Al-Fallujaning ekstremistlardan to‘liq ozod etilganligini rasman e’lon qildi. Hukumat kuchlarining Al-Fallujada terrorchilar bilan bir oyga yaqin davom etgan janglar davomida o‘n minglab mahalliy aholi shahardan qochib chiqdi. To‘qnashuvlarda bir necha ming jangari o‘ldirilganligi ma’lum qilindi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)