Буюк Британия ички ишлар вазири Тереза Мэй мамлакат бош вазири лавозимига номзодлардан бирига айланиб, Лондон собиқ мэри Борис Жонсонга кучли рақобатчи бўлиши мумкин. Бу ҳақда Британиянинг The Guardian газетаси ҳукмрон Консерватив партия депутатларига таяниб хабар берди, деб ёзади «ТАСС». Партия октябрь бошигача истеъфога чиқаётган бош вазир Дэвид Кэмерон ўрнига янги етакчи танлаши керак.
«ИИВ раҳбари Тереза Мэй консерватор депутатлар орасида ‘Борисни тўхтат’ кампаниясида энг оммабоп вариантга айланмоқда, ушбу депутатлар янги бош вазир Буюк Британия Евроиттифоқдан чиқишни ёқлаб овоз берган бир вазиятда партияни бирлаштиришини истайди», — деб ёзди нашр ўз электрон версиясида.
Айни пайтда консерваторлардан ҳеч бири бош вазир лавозими учун курашиш режалари ҳақида эълон қилганича йўқ. Аммо, нашр таъкидлашича, евроскептиклар лагерини бошқарган ва Brexit у учун шахсий сиёсий ғалаба бўлган Жонсон — бош вазир қароргоҳини эгаллаш учун асосий номзод.
Эслатиб ўтамиз, Буюк Британия бош вазири Дэвид Кэмерон, қироллик аҳолиси референдумда мамлакатнинг Европа Иттифоқидан чиқиши учун овоз берганидан сўнг, истеъфо беришини маълум қилган эди.
Изоҳ (0)