Тошкентдан шимоли-шарқ томондаги тоғли ҳудудлар, Самарқанддан жануби-шарқ томондаги тоғ тизмалари ҳамда Жиззах билан Самарқанд вилоятлари ўртасида жойлашган тоғ тизмалари шамол салоҳияти юқори бўлган ҳудудлар сирасига киради. Кейинги ўринда эса Навоий вилояти ва Қорақалпоғистон Республикаси туради. Шу ва бошқа масалалар Тошкентда ўтган Ўзбекистоннинг шамол-энергетик салоҳиятига бағишланган иккинчи миллий конференцияда муҳокама қилинди, деб ёзади «Ўздавэнергоназорат» инспекцияси расмий сайти.
«Навоий вилояти, Қорақалпоғистон ва бошқа тоғли ҳудудларда шамол салоҳияти юқори. Иккита салоҳияти нисбатан юқори бўлган ҳудудда шамол паркларини ташкил этишни режалаштиряпмиз. Парк учун жойни аниқлаш мақсадида шамол шароитини таҳлил қилиб, бунда ердан фойдаланиш хусусиятлари, электр ва транспорт тармоқларининг мавжудлиги ҳисобга олинмоқда», — деди Geo-Net компанияси лойиҳа менежери Йоханес Бекер.
Ҳар бир ҳудудда қуввати 100 мегаватт бўлган шамол энергияси паркини ташкил этиш ҳар йили мос равишда 326 миллион ва 358 миллион киловатт/соат электр энергиясини ишлаб чиқариш имконини беради. Бу эса 180 мингта оила бир йилда ўртача ишлатадиган энергияга тенгдир.
«Бизнинг таҳлилларга кўра, Ўзбекистон шамол энергиясини ривожлантириш бўйича катта салоҳиятга эга, — дейди Intec-GOPA компаниси лойиҳа директори Мартина Дабо. — Дунёнинг қатор давлатларида шамол нафақат электр энергияси учун, балки хоналарни иситиш ва ҳавони совитиш учун ҳам ишлатилади. Бу Ўзбекистон учун ҳам долзарбдир. Бундан ташқари, шамол энергиясини ишлаб чиқаришда ерга ишлов берадиган махсус мосламалардан фойдаланиш мумкин».
Изоҳ (0)