Тошкентдаги Инҳа университети 2016—2017-ўқув йилида 330 нафар талабани қабул қилади. Шунингдек, ўқув юртида янги йўналиш очилади. Бу ҳақда Тошкентдаги матбуот анжумани чоғида университет ректори Шерзод Шерматов маълум қилди, дея хабар беради UzDaily.
Ректорга кўра, келгуси ўқув йилидан университетда янги — логистика йўналиши очилади. Мазкур факультетнинг ўқув дастури халқаро логистика, етказиб беришлар тизимини бошқариш, юк ташиш, ҳаво ва темир йўл транспортини бошқариш тизими каби профессионал, бизнес жараёнларини бошқариш, ресурсларни режалаштириш ва бошқариш тизими каби ахборот йўналишларига асосланади. Ушбу йўналишни муваффақиятли якунлаган мутахассислар логистика жараёнларини бошқариш – логистика компаниясини тузишдан то унинг фаолиятини юритишга қадар бўлган барча билимларни эгаллайди.
Янги факультетга кириш имтиҳонида математикадан имтиҳонни муваффақиятли топширган ҳамда камида 6 баллик IELTS сертификати ёки 75 баллик TOEFL сертификати мавжуд бўлган талабалар қабул қилинади. Факультетда ўқиш контракт асосида бўлади. Шунингдек, кириш имтиҳони натижаларига кўра 5 нафар энг яхши талаба биринчи ўқув йилининг биринчи семестри учун ўқиш тўловидан бутунлай ёки эллик фоизга озод этилади. Бундай имтиёзлар биринчи семестрни энг юқори баллар билан тамомлаган дастлабки беш нафар талабага ҳам берилади. Шу билан бирга, манфаатдор корхоналар томонидан кейинчалик ишлаб бериш шарти билан талабалар ўқиши учун мақсадли грант ажратилиши мумкин.
2016—2017-ўқув йилида Инҳа университети «Компьютер инжиниринг» ва «Дастурий инжиниринг» йўналишларига 250, логистика йўналишига 80, жами 330 нафар талабани қабул қилади.
Изоҳ (0)