The Telegraph: O‘zbekistonda o‘zingizni zamonlar osha sayohat qilayotgandek sezasiz

Buyuk Britaniyaning The Telegraph nashri O‘zbekistonga tashrif buyurish uchun 11 ta sabab keltirilgan maqolani chop etdi. Shu sabablardan eng qiziqarlilarini e’tiboringizga havola etamiz.

Bu yerda Buyuk ipak yo‘lining eng yaxshi qismlari joylashgan

“Agar siz Buyuk ipak yo‘liga qiziqsangiz, ammo uni Xitoydan Turkiyagacha bo‘lgan bor bo‘yicha sayohat qilishga vaqtingiz bo‘lmasa, ushbu yo‘lning uchta eng muhim shaharlarini O‘zbekistonda topasiz. Xiva, Buxoro va Samarqand savdogarlar uchun asosiy to‘xtash joylari bo‘lgan”, — deyiladi maqolada.

O‘zingizni zamonlar osha sayohat qilayotgandek sezasiz

“Xiva YuNESKO himoyasiga olingan ochiq osmon ostidagi muzey, ammo u yerda haligacha oilalar yashaydi, tadbirkorlik faoliyati olib boriladi, — deya qayd etiladi maqolada. — Unga VI asrda asos solingan va Buyuk ipak yo‘lining savdo shahri sifatida gullab-yashnagan — masjid, madrasa va maqbaralar shaharning egri-bugri va chalkash ko‘chalarida ko‘payib borgan, ularning barchasi esa mohirona tarzda qayta tiklangan.

Kech tusha boshlagach, mahalliy sayyohlar — suratga tushish payida go‘zal manzara qidirgan kelin-kuyovlar-u, hunarmandchilik buyumlarini ko‘z-ko‘z qilgan ustalar uyga ketib, ko‘chalar huvillab qoladi. So‘nib borayotgan quyosh nuri ostida qaldirg‘ochlar parvoz qilayotgan va loy devorlari shafaqda qizarib qolgan ko‘chalarni kezar ekansiz, o‘zingizni beixtiyor XII asrda yurgandek his qilasiz”.

Manzilga yetib borish siz o‘ylagandan ko‘ra osonroq

O‘zbekistondagi asosiy manzilgohlarga arzon ichki parvozlar, yo‘l bog‘lamalari va tezyurar poyezdlar bilan yetib borish mumkinligi ta’kidlangan. “Shaharlarning barchasida taksi va avtobus xizmatlari mavjud, buning ustiga, Toshkentda bekatlari Sankt-Peterburg uslubida hashamatli qilib bezatilgan yaxshigina metro bor”, — deb yozadi nashr.

O‘zbekistonga sayohat — xavfsiz

Nashr O‘zbekistonda hech kimga xiralik qilinmasligi, qat’iy “yo‘q” deyish orqali yoqimsiz vaziyatga chek qo‘yish mumkinligini qayd etdi. “Bu yerda sayyohlarga nisbatan jinoyat juda kam kuzatilishi kishini xotirjam qiladi”, — deyiladi maqolada.

Xarid uchun ajoyib joy

“Amir Temur va uning avlodlari Xiva, Samarqand va Buxoro shaharlarini go‘zallashtirish uchun mamlakatning turli burchaklaridan kulol, rassom va me’morlarni chaqiradi. Ularning masjidlari eng nafis devoriy suratlar va terma naqshlar bilan bezatiladi. O‘zbekistonda hunarmandchilik mahorati hozirgacha saqlanib qolgan, siz hozirda bozorlarga aylantirib yuborilgan madrasalarning ko‘pchiligida arzimagan pulga kulolchilik buyumlari, kashtalar, ipak mato va  miniatyuralarni xarid qilishingiz mumkin”, — deyiladi maqolada.

Hayratlanarli darajada dunyoviy

Nashr Toshkent va Buxoro shaharlari ayniqsa yevropacha sharoitga ega ekanligini qayd etadi. “Ko‘l bo‘yidagi pivoxonalar, istirohat bog‘lari va asosiy sayyohlik manzilgohlari yonidagi qahvaxonalarni ko‘z oldingizga keltiring. Muzqaymoq yeb, cheksiz miqdorda ko‘k choy simirgach, O‘zbekistonga sayohatingiz quvnoq o‘tayotganidan mamnun bo‘lasiz, xolos”, — deya qayd etiladi nashr xabarida.