«Электрон ҳукумат тўғрисида»ги Ўзбекистон Республикасининг қонунини амалда татбиқ этиш доирасида 2016 йилнинг 2 июнь куни Вазирлар Маҳкамаси «Электрон давлат хизматларини кўрсатиш тартибини такомиллаштириш чоралари тўғрисида»ги қарорни қабул қилди. Бу ҳақда Ахборот технологиялари ва коммуникацияларини ривожлантириш вазирилиги матбуот хизмати хабар бермоқда.
Ҳужжатда давлат хизматларини электрон шаклда кўрсатиш жараёнида ортиқча оворагарчиликлар олдини олиш, аҳоли ва бизнес вакилларидан талаб қилинадиган ҳужжат ва сўровларни қисқартириш, хизмат кўрсатиш жараёнини соддалаштириш, шунингдек, давлат органлари ҳужжатларини ягона шаклга келтириш каби вазифалар белгилаб берилган.
Электрон давлат хизматларини кўрсатишни такомиллаштириш тартиби бир неча босқичдан иборат. Аввалига, аҳоли ва бизнес вакилларига кўрсатиладиган, талаб юқори бўлган хизматлар таҳлилллар асосида аниқлаб олиниб, самарали хизмат кўрсатиш билан боғлиқ тўсиқлар ўрганилади.
Шундан сўнг электрон хизматларни кўрсатишнинг энг мақбул усули ишлаб чиқилиб, сўнг қонунчилик доирасида жамоатчилик ва экспертлар фикр-мулоҳазаси асосида такомиллаштирилади.
Айни пайтда Ахборот технологиялари ва коммуникацияларини ривожлантириш вазирлиги ва унинг қошидаги «Электрон ҳукумат» тизимини ривожлантириш маркази, БМТнинг Тараққиёт дастури, Осиё тараққиёт банки, халқаро экспертлар билан биргаликда бир қанча давлат хизматларини электрон шаклга ўтказиш юзасидан ҳамкорлик олиб бормоқда.
Изоҳ (0)