«Гагарин ҳеч нарса қилмаган, у ётган»: Юрий Лозанинг интернетни «портлатган» гапи

Россиялик мусиқачи Юрий Лоза сўнгги вақтларда интернетда илмоқли гаплари билан машҳур бўлиб кетди, деб ёзади «ТАСС».

2 июнь куни бастакор телевидениедаги интервьюсида The Beatles муваффақиятининг сабаблари ҳақида гапирар экан, коинотга учган илк одамни ливерпуллик тўртлик билан қиёслади ва Юрий Гагарин ҳеч нарса қилмасдан, «шунчаки ётгани»ни айтди. Бу гап ижтимоий тармоқларда кенг муҳокамага сабаб бўлди.

«Гап нимадалигини биласиз. Гагарин биринчи бўлган. Гагарин ҳеч нарса қилмаган, у ётган. У биринчи энг муҳим космонавт. The Beatles ҳам биринчи бўлган, улар зарур жойда зарур вақтда бўла олган», — деди Лоза.

Бу гапга биринчи бўлиб очиқ коинотга чиққан собиқ иттифоқ космонавти Алексей Леонов муносабат билдирди. У қўшиқчини «ярамас одам» деб атади.

Лоза ҳам Леоновнинг айбловларини жавобсиз қолдирмади. «Леонов Гагарин у ерда нима қилган деб ҳисоблайди? Сакраганми, қўшиқ айтганми, рақс тушганми — нима қилган? У ётган. Леонов нимага хафа бўлади? Мен айтдимки, Гагарин — биринчи буюк космонавт, бироқ ракетада у ётган. Бу барча китобларда ёзиб қўйилган», — деди Юрий Лоза.