Фото: Тошкентнинг Шимолий вокзали яқинида катта тирбандлик юзага келди

Тошкентда 1 июнь, чоршанба куни Шимолий вокзал яқинидаги чорраҳаларда катта тирбандлик юзага келди. Тирбандлик суратлари Facebook’даги «Водители Ташкента» гуруҳида эълон қилинган.

Тирбандлик суратига изоҳ бераркан, баъзи фойдаланувчилар: «Худди Москванинг ўзи-ку!», — деб ёзган. Қатор фойдаланувчилар одатда 10—20 дақиқада босиб ўтиладиган йўлда камида бир соат қолиб кетганини маълум қилган.

«Водители Ташкента» гуруҳига аъзо ҳайдовчиларнинг ёзишича, Тошкент халқаро аэропортига олиб чиқувчи кўприк ва Кичик ҳалқа йўлининг эски ТошМИ тарафдаги йўл ўтказгичидаги қурилиш-таъмирлаш ишлари, шунингдек, йўл ишлари вақтида баъзи қоидабузар ҳайдовчиларнинг тартибсиз ҳаракатлари тирбандликка сабаб бўлган.

Эслатиб ўтамиз, айни вақтда Тошкентнинг қатор марказий ва бошқа кўчаларида реконструкция ва таъмирлаш ишлари олиб борилмоқда, бир қатор янги кўчалар қурилмоқда.

Тошкент ҳокимлиги шаҳар йўлларида юзага келаётган вазиятга фуқаролар тушуниш билан муносабатда бўлишига умид билдирган.