Ўзбекистон миллий терма жамоаси билан 2 июнь куни майдонга тушиши керак бўлган ва кейинроқ ЎФФ хоҳишига кўра рақибсиз қолган Қирғизистон терма жамоаси 7 июнь куни Эронга қарши ўртоқлик ўйинида майдонга тушади. Бу ҳақда «Championat.asia» Tehran Times нашрига асосланиб хабар берди.
Ўзбекистон терма жамоаси белгиланган ўртоқлик ўйинидан воз кечгач, Қирғизистон термаси ўз режаларига ўзгартириш киритишга мажбур бўлган ва йиғинни бир ҳафта кейинроққа қолдирган, қўшимчасига легионер футболчилар унга жалб қилинмайдиган бўлганди. Бу орада Қирғизистон терма жамоаси 7 июнь куни Қозоғистоннинг «Ордабаси» клуби билан майдонга тушишни келишиб олганди.
Ўзбекистон миллий терма жамоасининг ЖЧ—2018 йўлидаги рақиби Эрон эса 7 июнь куни айнан Қирғизистон билан беллашишга қарор қилди. Шу куни Қозоғистон терма жамоаси ЖЧ—2018 3-саралаш босқичидаги Ўзбекистоннинг яна бир рақиби Хитой билан майдонга тушади. Қайд этиш керак, август ойи охирида Қирғизистон ва Қозоғистон терма жамоалари ҳам ўзаро ўртоқлик учрашуви ўтказади.
Қирғизистонга қарши учрашувни бекор қилиб, Экваториал Гвинея билан 2 июнь кунига келишув тузган ва Тошкентдаги ўртоқлик учрашуви учун 28 май кунидан бошлаб чипталарни сотувга чиқарган ЎФФ «Chempionat.asia» маълумотига кўра ўзига янги рақиб топди. 2 июнь — пайшанба куни Самвел Бабаян шогирдлари Ўзбекистонда тўп сураётган легионер футболчилар термасига қарши майдонга тушади.
ПФЛ регламентига кўра, Ўзбекистон Олий Лигасида хорижлик посбон ўйнай олмайди. Шундан келиб чиқилса, Ўзбекистон миллий терма жамоасига қарши ўйинда қайси посбоннинг майдонга тушиши сўроқ остида.
Изоҳ (0)