Алкоголсиз ичимликлар ишлаб чиқариш бўйича дунёдаги энг йирик компания бўлган Coca-Cola 1 августдан бошлаб халқаро бизнесини ташкиллаштиришнинг ўзгартириш режаларини эълон қилди. Бу ҳақда «Интерфакс» хабар бермоқда.
Компания пресс-релизида билдирилишича, ўзгаришлар натижасида учта мустақил бўлинмадан (Европа, Евросиё ва Африка) Европа, Яқин Шарқ ва Африкадаги (EMEA минтақаси) бизнес учун жавоб берадиган битта гуруҳ ташкил этилади. Уни Лотин Америкаси бўлинмаси раҳбари Брайан Смит бошқаради.
Шунингдек, гуруҳнинг ўзида ҳам ўзгаришлар рўй беради. Жумладан, Марказий ва Шарқий Европадаги, шунингдек, Россия, Украина ва Беларусдаги операциялар битта бўлинмага жамланади. Унга Никос Кумметис раҳбар этиб тайинланди. Россия, Украина ва Беларусдаги операциялар учун жавоб бериб келган Зоран Вучинич Яқин Шарқ ва Шимолий Африкадаги бўлинмага бошчилик қилади.
Осиё-Тинч океани гуруҳи президенти этиб Жанубий Лотин Америкасидаги операциялар учун масъул Жон Мёрфи тайинланди.
«Ушбу ўзгаришлар ичимликлар бизнеси аҳамиятининг ошиб бораётганлиги, шунингдек, компанияда қанчалик кўп катта тажрибага эга топ-менежерлар ишлаётганлигини кўрсатади», — дея маълум қилган Coca-Cola директорлар кенгаши раиси Мухтор Кент.
Қайд этиш жоизки, 24 май, сешанба кунги савдолар чоғида Coca-Cola акциялари 0,1 фоизга қимматлашган, йил бошидан бери эса компания капиталлашуви 2,7 фоизга — 190 миллиард долларгача ошган.
Изоҳ (0)