Шу ой Ўзбекистоннинг айрим ҳудудлари, хусусан, Тошкентда кучли шамоллар кузатилди. Бунинг оқибатида кўплаб дарахтлар автомобиллар тўхташ жойи ва қатнов қисмларига қулаб тушди. Шу боис кўпчиликда суғурта компаниялари табиий офат туфайли жабрланган автомашиналарга зарарни тўлаб бериши ёки йўқлиги ҳақида саволлар пайдо бўлди, деб ёзади «Даракчи.uz».
«Суғуртанинг мажбурий ҳамда ихтиёрий турлари мавжуд. Агар автомашина ихтиёрий суғурта тури бўйича суғурталанган бўлиб, суғурта шартномасида суғурта ҳолатлари сифатида содир бўлган табиий офат оқибатида етказилган зарарнинг қопланиши белгиланган бўлса, бундай ҳолда албатта суғурта компанияси етказилган зарарни тўлаб беради», — деб таъкидлайди «Ўзбекинвест» экспорт-импорт миллий суғурта компанияси матбуот хизмати бошлиғи Ортиқхўжа Норов.
«Республикамизда амалдаги ‘Транспорт воситалари эгаларининг фуқаролик жавобгарлигини мажбурий суғурта қилиш тўғрисида’ги қонунга мувофиқ, суғурталовчининг учинчи шахс олдидаги жавобгарлиги суғурталанган бўлиб, унинг ҳаёти, соғлиғи ва мол-мулкига ушбу суғурта ҳодисаси оқибатида етказилган зарарнинг ўрнини шартномада шартлашилган ҳақ, яъни суғурта мукофоти эвазига суғурта пули доирасида қоплаш мажбуриятини олади. Бунда табиий офат суғурта ҳодисаси сифатида кўзда тутилмаган», — қўшимча қилди у.
Изоҳ (0)