Ўзбекистон ҳудудида 2016 йил 10—16 май кунлари кучли ёмғир ёғиши оқибатида Наманган, Сурхондарё, Навоий, Тошкент вилоятлари ва Тошкент шаҳрининг айрим ҳудудларида сел оқимлари ва сув тошқинлари ҳодисалари кузатилди. Ўзбекистон Фавқулодда вазиятлар вазирлиги матбуот хизмати ахборотига кўра, юзага келган фавқулодда вазиятлар оқибатида фуқаролар жабрланган, ҳудудлар ва транспорт тармоқларига зарар етказилган.
Фавқулодда вазиятлар оқибатларини бартараф этиш мақсадида фақулодда вазиятларда уларни олдини олиш ва ҳаракат қилиш давлат тизимининг тегишли хизматлари томонидан кечиктириб бўлмайдиган тадбирлар амалга оширилган. «Маънавий ва моддий зарар кўрган фуқароларга маҳаллий ҳокимият органлари томонидан зарурий ёрдамлар кўрсатилган», — дейилади вазирлик ахборотида.
Наманган вилояти
10 май куни Наманган вилояти «Чодак» қишлоқ фуқаролар йиғини ҳудудида кучли ёмғир ёғиши оқибатида сел тошқини юзага келиб, 96 та аҳоли хўжаликлари зарар кўрган, 1 та хўжалик бутунлай вайрон бўлган. Аҳоли хафвсизлигини таъминлаш мақсадида 129 та хўжаликда яшовчи 205 нафар фуқаролар вақтинчалик хавфсиз ҳудудларга кўчирилган. Юзага келган фавқулодда вазият оқибатларини бартараф этишда фавқулодда вазиятлар давлат қуйи тизими (ФВДқТ)нинг тегишли хизматларидан 32 та техника, 197 нафар ходимлар жалб этилган.Туман давлат санитар эпидемиологик назорат маркази (ДСЭНМ) мутахассислари томонидан 51 та хонадон ўрганиб чиқилиб, аҳоли яшаш жойлари ҳамда кўчаларда 3112 метр квадрат ҳажмдаги майдонлар дезинфекция қилинди. Шунингдек, очиқ сув ҳавзаларидан 20 та бактериологик, 4 та кимёвий текширишлар учун наъмуналар олинди. Аҳолига олиб келинган ичимлик сувидан 4 бактериологик, 2 та кимёвий текширишлар учун наъмуналар олиниб, туман ДСЭНМ лабораториясига юборилди.
Сел оқими таъсирида зарар кўрган 28 та хонадонда истиқомат қилувчи фуқароларга вилоят хокимлигининг беғараз ёрдами (ҳар бир хонадонга 1 қопдан ун, 5 килограммдан ўсимлик ёғи, 10 килограммдан гуруч, 5 килограммдан шакар, 30 донадан тухум, 1 килограммдан сариёғ, 1 килограммдан чой, 10 килограммдан макарон ва 4 донадан хўжалик совуни) тарқатилди.
Сурхондарё вилояти
10—11 май куни Сурхондарё вилоятининг Узун, Сариосиё туманларида кучли ёмғир ёғиб, сел тошқини вужудга келиши оқибатида 46 та аҳоли хўжаликларига, шунингдек, 4Р-107 автомобиль йўлининг 46—50-километрларига зарар етказилган. Аҳоли хавфсизлигини таъминлаш мақсадида 59 та хўжаликда яшовчи 342 нафар фуқаро хавфсиз ҳудудларга кўчирилган. Фавқулодда вазиятлар оқибатларини бартараф этишда 20 та техника, 82 нафар ходимлар жалб этилган.Узун тумани хокимлиги томонидан Хўжаасмин қишлоғи аҳолисига 15 қоп ун ва 48 килограмм гуруч ва 1 миллион сўм миқдорида молиявий ёрдам кўрсатилган.
Тошкент вилояти
11 май куни Тошкент вилояти Оҳангарон тумани Қаирма қишлоғи ҳудудида кучли ёмғир ёғиши оқибатида сел оқими вужудга келиб, А-373 «M-39 Гулистон—Бўка—Ангрен—Қўқон—Андижон орқали—Ўш» автомобиль йўлининг 150—155-километрларидаги узунлиги 50 метр, эни 2,5—3 метр масофада йўлнинг қатнов қисмига зарар етказилган. Фавқулодда вазият оқибатини бартараф этиш ишларига 57 та техника, 129 нафар ходим жалб этилган.15 май куни Наманган вилояти Поп тумани «Чодак» ҚФЙ, «Бўён» МФЙ, «Калқурбон» МФЙ кучли ёмғир ёғиши оқибатида сел оқими вужудга келган. Сел оқимлари оқибатида 58 та хўжалик зарар кўрган. Фавқулодда вазият оқибатини бартараф этиш ишларига 28 та техника, 212 нафар ходим жалб этилган.
Изоҳ (0)